Choćebuz (SN/MiR). Po poručenju komisije ekspertow braniborskeho knježerstwa za natwar uniwersitneje mediciny we Łužicy je jenož pjeć lěta trało, doniž njejsu ideju zwoprawdźili. To běše zakład za intensiwny proces wuwića cyłozwjazkoweho jónkrótneho koncepta. Předloni, 1. julija su medicinisku uniwersitu Lausitz–Carl Thiem załožili. Lětsa w zymskim semestrje 2026/2027 zahaji tam 36 studentow a studentkow modelowy studijny směr humanmediciny. Hač do lěta 2035 ma ličba na něhdźe 165 studowacych wob lěto stupać. Braniborski ministerski prezident Dietmar Woidke rjekny: „Łužica je husto słyšała, što wšitko móžno njeje. Dźensa pak pokazujemy, što zwoprawdźić móžemy. Choćebuz je mjeztym najbóle dynamiske město Němskeje. Hdźež su lětdźesatki wuhlo wudobywali, wutwarjamy nětko modelowy region za strowotu a slědźenje. To je wjace hač strukturny projekt – je to přilubjenje wobydlerjam Braniborskeje.“