W Koblicach wuhotuja kónc tydźenja 23. zetkanje wlečakow

Koblicy (AK/SN). Traktor Ursus typa Lanz budźe sobu to prěnje, štož wopytowarjo 23. zetkanja wlečakow kónc tydźenja na kromje Koblic pola Wulkich Zdźarow wuhladaja. Minjene dny je traktor hišće młóćawu typa Tatra 815 ćahnył. Na jeje přikładźe chcedźa hosćom zetkanja demonstrować, kak su něhdy młóćili. Za wodźidłom Lanza sedźeštaj Anne Wohler a jeje nan Maik. „W Koblicach nawuknješ z traktorom jěć hižo prjedy hač móžeš běhać. Ja sym to wot swojeho dźěda nawuknyła. Motor tajkeje mašiny mje někak změruje“, powěda Anne Wohler. Wona słuša k najmłódšim čłonam towarstwa přećelow wlečakow. Před lětomaj bě jemu ze swojim nanom přistupiła.