25 lět po wojowanju wo srjedźnu šulu w Chrósćicach – Jan Nuk bilancuje

Chrósćicy (SN/mb). Přichodnu njedźelu budźe tomu 25 lět, zo je so w Chrósćicach něšto stało, štož němske medije takle zjimachu: „Der Pfarrer stürmte die Schule mit den Kindern.“ Přiwšěm běše podawk měrny: Po rańšich kemšach na spočatku šulskeho lěta je farar Clemens Hrjehor 17 šulerjow 5. lětnika do srjedźneje šule „Jurij Chěžka“ wjedł. To bě zmužity skutk, dokelž po woli kultusoweho ministerstwa so tuta rjadownja w Chrósćicach zarjadować njesmědźeše. Něhdźe 200 kemšerjow, kiž běchu ze wšěch wosadow přijěli, dźěše sobu na šulski dwór. To bě prěni dźeń Chróšćan zběžka, kotryž hač do 10. septembra traješe.