Budyšin (SN/StŠ). Nimale dwě njedźeli hižo nakładuja wulke bagry na kromje puća mjez Słonej Boršću a Budyšinom stotki tonow pjeršće na nakładne awta. Twarske dźěła bjezposrědnje při železniskim přechodźe słuža škitej bliskeje měšćanskeje štwórće Židowa před wulkej wodu a přepławjenjom. Kaž měšćanski zarjad w nowinskej zdźělence pisa, nastawa na terenje bywšeje železniskeje čary Budyšin-Wojerecy wulka žłobina. „Do tuteje žłobiny ma so pozdźišo wša woda, kotraž při dešću a njewjedrach po polach ze směra Słoneje Boršće hač sem na kromu Budyšina přiběži, wotwodźeć. A wottud ma so wona do wulkeho spjatnišća dale wjesć. Z tutej naprawu maja so wobydlerjo a ležownosće deleka w Židowje škitać“, tak Silke Meyer z měšćanskeho zarjada. Dohromady 450 000 eurow projekt płaći.