Gmejna porokaj dotalneho dodawarja wotpokazuje
Łaz (AK/SN). Łazowska gmejna na tym wobsteji, zo maja Wojerowske zastaranske zawody koncesiju za milinowu syć w komunje dóstać. Tole podšmórny wjesnjanosta Thomas Leberecht (CDU) wčera po posedźenju gmejnskeje rady. Wjetšina jeje čłonow je wčera njezjawnje wobzamknyła, porokaj energijoweho koncerna enviaM wotpokazać. Po měnjenju gmejny njeje wona žane prawniske zmylki činiła.
20 lět je enviaM Łazowsku gmejnu z milinu zastarał a smědźeše za to milinowody w komunje wužiwać. Potom su koncesiju za čas wot 2023 hač do 2042 znowa wupisali. W juniju 2024 bě so gmejnska rada jednohłósnje za Wojerowske zastaranske zawody jako noweho partnera rozsudźiła. EnviaM pak tónle rozsud njeakceptowaše a wupraji w juliju 2024 a w měrcu 2025 porokaj. Nimo toho wuskutkowa koncern na Lipšćanskim krajnym sudnistwje nachwilny wukaz, zo nima gmejna nowe zrěčenje wo koncesiji wotzamknyć. Jeli so wona po tym njezměje, hrozy komunje pokuta we wysokosći 250 000 eurow abo wjesnjanosće Thomasej Leberechtej hač do dweju lět jastwa.
