Wobydlerjo Worklec a wokoliny, ale tež wšitcy dalši zajimcy móža so nětko na cyle­ nowe wašnje wo Worklečanskim hrodźe a wo Stollbergec swójbje wobhonić.

Worklecy (SN/MWj). Dlěje hač 20 lět je Worklečanski chronist dr. Beno Wałda material wo stawiznach tamnišeho hrodu, jeho chorownje a wo Stollbergec swójbje zběrał. Z toho je kniha „Stawizny a stawiznički wokoło Worklečanskeje chorownje“ nastała, kotraž nětko před­leži.

„Sotra Teatildis z rjada Božeje předwidźiwosće je mje w 1990tych lětach narěčała, hač njemóhł so ze stawiznami hrodu a chorownje zaběrać. Tak sym započał najwšelakoriši material zběrać“, Beno Wałda powěda. Při tym je tež wustajeńca we Worklečanskej šuli nastała. Po tym zo je so wón loni srjedź lěta na wuměnk podał, je so započał chutnje z knihu zaběrać. Nětko je wona z pomocu Wojerowskeho nakładnistwa Scholz w nakładźe 300 eksemplarow wušła.