Radwor. Kajki bě to hołk a tołk sobotu na Radworskej kupje a před njej. Tam swjećachu tradicionalny swjedźeń wułójenja, kotryž přewjeduja kóžde lěto w oktobrje we wobłuku łužiskich rybowych tydźenjow. Při babylěćnym wjedrje zeńdźechu so domoródni a hosćo, zo bychu nazymski dźeń při słódnej jědźi, napojach a wězo čerstwym łužiskim karpje zakónčili. Organizowało je wšitko kupowe zjednoćenstwo. Jeho čłonojo a dalši pomocnicy ryby łójachu, zarězachu a kurjachu. Poskitk bě tež lětsa mnohostronski a sahaše wot wšelakich rybjacych specialitow přez azisku a madźarsku rybjacu poliwku hač ke kurjenej rybje. Wosebje woblubowany bě karpowy rězk. Paněrowany łužiski karpowy filet serwěrowachu z kisałymi běrnami, kałowej solotwju a ze samočinjenej jušku. Hižo po někotrych hodźinach bě wšitko wupředate.