Na domchowance w Čornym Chołmcu program ze serbskim wobsahom

Čorny Chołmc (SN/MiR). Krabatowy młyn w Čornym Chołmcu bě lětsa z kulisu zahajenja mjeztym 5. Krabatoweho tydźenja. Přisydnica Budyskeho krajneho rady dr. Romy Reinisch, předsyda Krabatoweho towarstwa Steffen Mühl kaž tež jednaćel Krabatoweho młyna Anton Fuchs witachu tam sta wopytowarjow młyna na lětušu domchowanku a skedźbnichu na wulku ličbu zarjadowanjow w běhu tohole tydźenja po cyłym Krabatowym regionje. Mühl rjekny na naprašowanje SN: „Krabatowy tydźeń zmóžnja, hižo znate a woblubowane znowa dožiwić. Wosebje pak wjeselu so nad nowymi poskitkami a sej přeju, zo by sej prawje wjele ludźi šěrokosć Krabatoweho regiona wotkryło.“ Trójka Čorny młynk (Dieter Klimek), Krabat (Wolfgang Kraus) a pisar (Hans-Jörg Schröter) předstajichu bajowu postawu Krabata a historisku wosobu Janka Šajatovića a jeju wliw na wuwiće we Łužicy­.