Wojerecy (KD/SN). Hižo dlěši čas we Wojerowskim zwěrjencu wo tym rozmysluja, kak móhli hladarjam zwěrjatow tam dźěło wolóžić. Wilu při zwjazkowej dróze B 97 zwěrjenc nětko na nowy hospodarski dwór přetwarja. Čłonam Towarstwa přećelow zwěrjenca, kotrež swjeći lětsa swoje 35lětne wobstaće, su njedawno twarnišćo pokazali a rozłožili, što tam nastawa.

Swoju wonkownu fasadu z klinkerami ma wjace hač sto lět stare twarjenje tež w přichodźe wobchować. Nutřka pak wutwarja nimo třoch běrowow moderne předrasćernje a sanitarne rumnosće, nawoda zwěrjenca Eugene Bruins znazorni. W jednym z běrowow změje Helmar Pohle,­ kotryž je za wšu picu zamołwity, swoje dźěłowe městno. Po jeho słowach zarjaduja w pódlanskich twarjenjach přihotowansku kuchnju za picu, hdźež matej tež wulki mróžak za rybu a wjacore kwadratne metry wulki chłódźak za sad a zeleninu stać. Wopytowarjo móža pozdźišo z wulkim woknom wobkedźbować, kak sobudźěłaćerjo picu za jednotliwe zwěrjata přihotuja. Dale zarjaduja skład za pšeńcu, ječmjeń a wšelake pelety.