Trjebin (AK/SN). Trjebinska gmejna wočakuje lětsa mjenje dochodow z přemysłoweho dawka a z pěstowarskich přinoškow. Financne połoženje wostanje při­wšěm stabilne, rjekny komornica Dana Piehl na zašłym posedźenju gmejnskeje rady. Hač do kónca junija bě mjenje hač połojca planowanych dawkow dóšła. Dokelž je mjenje dźěći, tež staršiske přinoški w pěstowarni woteběraja.

Najebać to gmejna lětsa na wjacorych městnach inwestuje. Najwažniše předewzaća su přitwar wohnjowobor­neje gratownje, třěcha nad městnom za wotstajenje kolesow při gratowni, zru­nanje městna za twarski dwór a saně­rowanje mosta nad Sprjewju při Rulec młynje.

„Móst smy minjeny tydźeń dotwarili“, praji wjesnjanosta Robert Sprejz (nje­stronjan). Twarske płoty su zrumowane. Nowe taflički na to skedźbnjeja, zo smědźa móst jenož pěšcy wužiwać. Zadźěwki, tak mjenowane polery, znjemóžnjeja, zo jězdźidła po mosće jědu. Kluče za zadźěwki ma komuna. Jenož twarski dwór a wohnjowa wobora smětej móst w nuznym padźe z jězdźidłami wužiwać.