Sulšecy (SN/MWj). Wot zašłeho lěta stara so wjesna zhromadnosć w Sulšecach wo swój kulturny dom. „Wjesnjanam je wutrobna naležnosć, dom nic jenož zachować, ale jón modernizować a za swjedźenje a kulturne zarjadowanja přewostajić“, Birgit Leonhardt jako jedna ze zamołwitych zdźěli. Mjez druhim su w zašłosći jewišćo ponowili a za to wjacore dźěłowe akcije organizowali. Hač do lěta 2029 su dalše twarske naprawy předwidźane. Potom swjeći Sulšečanski kulturny dom swoje 60lětne wobstaće. Za před nimi stejace nadawki so wjesne zhromadźenstwo, Halštrowska młodźina, wjesny klub a towarstwo Bratrowstwo zhromadnje angažuja.





