Zhromadna naprawa Łazowskeje gmejny z Budyskim wokrjesom
Šćeńca (AK/SN). Wokrjesnu dróhu K 9220 w Šćeńcy we Łazowskej gmejnje chcedźa w lěće 2027 wutwarić započeć. Z tym so wjelelětne přeće wobydlerjow spjelni. Budyski wokrjes jako twarski knjez chce z naprawu dezolatny staw puća wotstronić. Prěni twarski wotrězk powjedźe wot křižowanišća při Preuschec brěčkarni hač ke kromje wsy do směra na Wysoku a Hermanecy. Tónle wotrězk je dokładnje 337 metrow dołhi. Na swojim posedźenju wutoru su čłonojo Łazowskeje gmejnskeje rady zrěčenju mjez wokrjesom a gmejnu přihłosowali. Po nim je wokrjes za dróhotwar zamołwity a gmejna ponowi w tym zwisku wodowód a kanal za dešćowu wodu. Projekt chcetej wokrjes a gmejna jako zhromadnu naprawu zwoprawdźić.





