Njeswačanscy radźićeljo njelube wobzamknjenja wospjetować dyrbjeli
Njeswačidło (JK/SN). Formalneho zmylka w zarjadnistwje dla dyrbješe Njeswačanska gmejnska rada wčera na swojim posedźenju wjacore rozsudy zašłych posedźenjow wospjetować a znowa wobzamknyć. Dokelž bě to jednanje pro forma, njejsu žane bliše wobstejnosće wopisali. Jeničce za staršich pěstowarskich dźěći njelube wobzamknjenje so tež z ličbami jewješe. Hižo wot 1. oktobra dyrbja za dźewjećhodźinske zastaranje dźěsća w žłobiku 390 eurow płaćić, za pěstowarske 218 eurow a za šěsćhodźinski přebytk w horće 115 eurow. Nowy popłatkowy porjad su radźićeljo tež za wužiwanje žarowanskeje hale na Njeswačanskim kěrchowje wobzamknyli. Tež tam sej wotnětka wyše wudawki za wužiwanje žadaja. Wšitke tute zwyšene popłatki maja konsolidowanju gmejnskich financow přinošować. Kaž komornica gmejny Tereza Spichalla radźićelam zdźěli, je staw financow tuchwilu poměrnje dobry a gmejna pisa čorne ličby, ma pak hišće w tutym měsacu nošerjej podźěl za wobhospodarjenje pěstowarnje płaćić.
