W Minakale su busowe zastanišćo na nowym městnje natwarili
Minakał (UM/SN). Busowy wobchad w Minakale je Radworska gmejna nětko na nowe wašnje organizowała a takrjec z dweju stareju zastanišćow jedne nowe sčiniła. Tele nowe centralne zastanišćo na južnym boku Klukšanskeje dróhi su minjene dny zjawnosći přepodali. Wone naruna dotalnej zastanišći na napřećiwnym boku puća kaž tež na južnej kromje wsy při Budyskej dróze.
„Wuchadźišćo bě iniciatiwa, kotrejež cil bě wěsćiši puć šulerjow k jich šulskemu busej“, Radworska wjesnjanostka Madeleine Rynčowa rozłoži. Zastanišćo při Budyskej dróze bě wotležane. Puć bě wuski a njewobswětleny. „K nowemu zastanišću maja dźěći a tež dalši ludźo, kotřiž chcedźa z busom sobu jěć, krótši a derje wobswětleny puć“, tak wjesnjanostka. Zo dyrbja ći, kotřiž zesrjedź wsy přińdu, nětko Klukšansku dróhu přeprěčić, wona za problematiske nima. „Puć hodźi so derje přewidźeć.“
