Berlin (dpa/SN). Wiceprezident zwjazkoweho sejma, Thomas Oppermann, je dospołnje njewočakowano zemrěł. 66lětny politikar SPD bě so wčera wječor při telewizijnym wusyłanju sćelaka ZDF zwjezł. Jeho dowjezechu hnydom do chorownje, hdźež wón wudycha.
Předsyda SPD Norbert Walter-Borjans reagowaše zludany. „Wulki šok nam wšitkim. Smy dospołnje poraženi a žarujemy z jeho přiwuznymi“, wón piše. Generalny sekretar SPD Lars Klingbeil pisa, zo je sej Oppermanna jako rozmołwneho partnera stajnje jara wažił. „Zo je wón přezahe zemrěł, nas wšitkich šokuje. Tež w rjadach politiskeho přećiwnika reaguja zludani. Zwjazkowy minister za hospodarstwo Peter Altmaier (CDU) piše w interneće: „Ty běše stajnje wulkotny demokrat a přistojny kadla. Twoju smjerć njemóžemy zapřimnyć.“ Městopředsyda FDP Alexander Graf Lambsdorf přiznaje, zo budźe Oppermann w politiskim swěće „jara pobrachować“. Městopředsydka AfD Beatrix von Storch waži sej jeho jako „sprawneho a fairneho“ politikarja.
Berlin (dpa/SN). Strowotniske zarjady we wjacorych němskich městach su přiběraceje ličby koronainfekcijow dla přećežene. We wjacorych městach njemóža hižo zdokonjeć, štož sej wot nich žadaja, zdźěli rěčnik knježerstwa Steffen Seibert minjeny pjatk w Berlinje. Tak njemóža w kóždym padźe wuslědźić, z kim je natyknjeny wšitko kontakt měł, kaž to tež w dźělach Berlina dožiwjeja.
Seibert wobydlerjow namołwješe, prawidła škita před infekcijemi kruće dodźeržeć. „Njejsmy bjezmócni, móžemy sami k tomu přinošować, dalše rozšěrjenje wirusa zadźeržeć.“
Warnowanjam, po kotrychž móhła ličba nowych infekcijow hižo bórze na 20 000 wob dźeń rozrosć, nochce so zwjazkowe knježerstwo přizamknyć. Seibert na to pokaza, zo měli pandemiju regionalnje a lokalnje wobhladować.
Prezident swětoweho zwjazka lěkarjow Frank Ulrich Montgomery bě warnował, zo móhli zamołwići kontrolu zhubić, dyrbjała-li so ličba infekcijow na 20 000 wob dźeń powjetšić. Pjatk běchu strowotniske zarjady 11 242 nowonatyknjenjow w Němskej zličili.
Priwatna sawna w radnicy ma za japanskeho měšćanostu njelubozne sćěhi. Kaž japanski dźenik Yomiuri Shimbun rozprawja, bě sej měšćanosta města Ikeda w prefekturje Osaka sawnu a fitnesowy nastroj w předrumnosći swojeho běrowa w radnicy nastajić dał. Po pokiwje swójbnych bě drje wón sawnu po měsacu zaso wotstronić dał, w mjezyčasu pak běchu medije hižo wo tym rozprawjeli. Měšćanosta je so mjeztym zamołwił.
Na chětro njewšědne wašnje su policisća w porynsko-pfalcskim Bad Kreuznachu drogi muža sćazali. Muž bě blachowu tyzu z marihuanu a tabletami do rěki ćisnył, jako chcychu jeho zastojnicy kontrolować. Policisća wupožčichu sej čołm wobydlerja a padlowachu za tyzu, doniž njemóžachu ju z wody wućahnyć. Policiji derje znateho muža su mjeztym wobsydstwa drogow dla wobskoržili.
Berlin (dpa/SN). Mandźelskeho strowotniskeho ministra Jensa Spahna (CDU) su tohorunja pozitiwnje na koronawirus testowali. Kaž rěčnik ministerstwa zdźěli, je wón wčera wječor wuslědk dóstał. Mjeztym staj wobaj zhromadnje w domjacej izolaciji. Mandźelski nima symptomy, Spahn ma zjawy nazymnjenja. Wón je ze žurnalistom Danielom Funku zmandźeleny. Po informacijach medijow su koronawirus mjeztym pola štyrjoch sobudźěłaćerjow Spahna zwěsćili.
Tarifowe jednanja přetorhnyli
Podstupim (dpa/SN). Dźěłodawarjo a dźěłarnistwa dale spytaja, po intensiwnych jednanjach wo nowe tarifowe zrěčenje tola hišće kompromis namakać. Jednanja běchu minjenu nóc po wjacorych hodźinach přetorhnyli. W běhu dnja chcychu so znowa zetkać, powěsćernja dpa rozprawja. Wo dotalnym stawje jednanjow nochcychu medijam ničo rjec. Dźe wo přichodne dochody 2,5 milionow přistajenych zjawneje słužby.
Sudnistwo zakoń zběhnyło
Drježdźany (dpa/SN). W boju přećiwo přiběracym ličbam koronainfekcijow je Sakska nowe škitne naprawy wukazała. Wone płaća wot jutře 0.00 hodź., tole ministerka za strowotnistwo Petra Köpping (SPD) wčera w Drježdźanach zdźěli. W dwuschodźenkowym planje płaća potom nowe wobmjezowanja za wužiwanje nahubnika, za priwatne swjedźenje, wulkozarjadowanja kaž tež za časy zawrjenja hosćencow – stajnje wotwisne wot regionalneho wuwića ličby koronainfekcijow. Nadrobnosće rjaduja wokrjesy same. „Połoženje infekcijow dla je chutne, ličby jasnje přiběraja“, ministerka rjekny. Swobodny stat dawa z nowym wukazom ramik, wokrjesy a města móža pak tež razniše postajenja wukazać. Nowe rjadowanje płaći najprjedy raz hač do 25. januara.
Po informacijach ministerstwa su wčera 471 nowych infekcijow a wosom dalšich smjertnych padow registrowali. Z tym je w Sakskej dotal 11 734 dopokazanych padow koronawirusa a 271 ludźi, kotřiž wot spočatka pandemije w zwisku z wirusom zemrěchu.
Nashville (dpa/SN). Medije USA sej měrniwy charakter wčerawšeho druheho a poslednjeho telewizijneho duela prezidenta USA Donalda Trumpa a jeho wužadarja Joewa Bidena chwala. „To bě woprawdźita debata“, zdźěli sćelak CNN po kóncu duela w Nashvillu w zwjazkowym staće Tennessee na swojej internetnej stronje. Hinak hač w prěnjej debaće mějachu wolerjo tónkróć składnosć, kandidatomaj připosłuchać a jeju posudźować, „bjez toho, zo dyrbjeli Trumpowe njepřestajne přetorhnjenja znjesć“, CNN dale piše. Prawdźepodobnje Trump na tym dźěła, so wobknježić. „Rozsudny přełam přećiwo Bidenej pak njeje so jemu poradźił.“
New York Times měrniwe wašnje duela tohorunja wita. Najebać to pak je rozdźěl mjez kandidatomaj hladajo na wobsah a wizije dale hoberski. Podobnje widźi to Wall Street Journal: „Kandidataj staj so hłubšo do politiskich prašenjow zanuriłoj hač při prěnim zetkanju a so do „razneje wuměny měnjenjow“ dałoj.
Ćeknjena kruwa žiwori hižo poł lěta njedaloko wojerskeho zwučowanišća w hornjopfalcskim Nabburgu a je so tam wočiwidnje zažiwiła. Dotal njeje so poradźiło, ju popadnyć. Kruwa bě sućelna z hródźe ćeknyła, jako dyrbješe na dejenje čakać. Mjeztym je ćeliła a muske ćelo porodźiła. Wobaj chowatej so w lěsach a přińdźetaj k žranju na bliske łuki. Přiwšěm chcedźa jeju popadnyć, zo njebyštej na bliskej dróze wobchad wohrozyłoj.
Wosobinske fotowe albumy awstriskeje kejžorki Elisabeth (1837–1898) pokazuja wot 24. januara 2021 w Kölnje. Kejžorka „Sissi“ wobsedźeše 18 albumow z něhdźe 2 000 fotografijemi, kotrež bě wosobinsce wuzwoliła, aranžowała a zalěpiła. Wosebje zajimawe su tři „albumy rjanolinkow“. W nich su portrety a fota wuspěšnych dźiwadźelnicow, kotrež bjerješe sej Sissi za swój styling za přikład.
Berlin (dpa/SN). Ličba dopokazanych nowych infekcijow z koronawirusom w Němskej dale přiběra a je mjeztym mjezu 10 000 překročiła. Strowotniske zarjady su Roberta Kochowemu institutej dźensa rano 11 287 nowoinfekcijow w běhu 24 hodźin přizjewili. To je dotal najwyša ličba w Němskej po wudyrjenju pandemije. Direktor instituta Lothar Wieler je w tym zwisku hišće raz na wobydlerjow apelował, so za škit před infekciju zasadźować a prawidła hygieny a wotstawka mjez ludźimi dodźeržeć.
Ke kompromisam zwólniwi
Podstupim (dpa/SN). Do dźensa so zahajaceho rozsudneho koła tarifowych jednanjow za zjawnu słužbu je społnomócnjeny komunalnych dźěłodawarjow, Lüneburgski wyši měšćanosta Ulrich Mädge, zwólniwosć ke kompromisam signalizował. „Wěrimy, zo móžemy so dojednać, to je naš zaměr“. Mädge je sej wěsty, zo su dźěłodawarjo ze swojim poskitkom jasny signal sadźili. Woni poskićuja 3,5 procentow wjace mzdy. Dźěłarnistwo ver.di žada sej 4,8 procentow.
Habeck kritizuje dojednanje