Budyšin (SN). Krajny rada Budyskeho wokrjesa Udo Wićaz (CDU) palne murje přećiwo druhim politiskim stronam wotpokazuje. Palne murje su smjerć demokratije a ignoruja wolu ludźi, rjekny Wićaz nowinarjam. Tole płaći tež za AfD. Hižo po wuzwolenju do zastojnstwa w juliju 2022 bě Udo Wićaz rjekł, zo trjeba politika runje na komunalnej runinje kompromisy, zo bychu wjetšiny nastali. Jemu dźe w kóždym padźe wo konkretnu wěc „a nic wo politisku barbu“.
Macron chce wojakow pósłać
Paris (dpa/SN). Francoski prezident Emmanuel Macron je potwjerdźił, zo zasadźenje wojakow w Ukrainje k wotwobaranju ruskeho dobyća njewuzamknje. „Wšitke tute opcije su móžne“, rjekny Macron telewizijnymaj sćelakomaj TF1 a France 2. Štóž chcył měr w Ukrainje zaručić, njesměł słaby być, tak prezident. Ruska njeje sej we wójnje přećiwo Ukrainje žane mjezy sadźiła, tuž njetrjebał tež zapad žane mjezy dodźeržeć, wón rjekny.
Němske lětadło pomha
Berlin (dpa/SN). Najebać mjezsobne njedorozumjenja w prašenjach Ukrainy a wěstotneje politiki staj so zwjazkowy kancler Olaf Scholz (SPD) a francoski prezident Emmanuel Macron dźensa w Berlinje zetkałoj. Pozdźišo přidruži so jimaj pólski ministerski prezident Donald Tusk. Bě to prěnje zetkanje třoch načolnych europskich politikarjow w formaće tak mjenowaneho Weimarskeho třiróžka po konferency juniju 2023.
Zetkanje wotmě so nimale tři tydźenje po konferency Ukrainy dla w Parisu, na kotruž bě 20 statnych a knježerstwowych šefow prošenych a kotraž bě so z eklatom skónčiła. Na zakónčacej nowinarskej konferency njebě Macron zasadźenje wojakow w Ukrainje wuzamknył. Scholz bě so tutomu wuprajenju wospjet spjećował. Na to wumjetowaše jemu Macron indirektnje bojazliwosć. Powšitkownje wočakowachu, zo so wobaj wujednataj.
Sobudźěłaćer Rěčneho centruma WITAJ a tam zamołwity za kubłanje swójbow Křesćan Lebza chce potrjebu za sportom dźěći spjelnić. Za to je wón poskitk w Chróšćanskej „Jednoće“ zrodźił. Hižo před wjace hač 15 lětami bě tež na iniciatiwu staršich w Radworju podobny poskitk wotměł. Tehdy pak wuwi so tole pod kłobukom tamnišeho sportoweho towarstwa. Hišće hač do dźensnišeho zetkawaja so zajimcy w zymje jónu wob tydźeń w „Slaviji“. Mjeztym tole Radworska staršiska iniciatiwa sobu podpěruje.
Prašam so, hač njemóhli tež dalše sportowe towarstwa w Hornjej Łužicy wotpowědne poskitki swójbam wuwić. Je, tak kaž w Chrósćicach, na kóždy pad sobudźěłaćer RCW za zwoprawdźenje tajkeje naprawy trěbny? Za towarstwa su poskitki młodym swójbam tola wuběrna šansa, sej talenty wotkryć a za poskićene sportowe družiny w towarstwje zahorjeć. Bianka Šeferowa
Hobersku malenu su w Awstralskej do Guinnessoweje knihi rekordow zapisali. 20,4 gramow ćežki a módry eksemplar je wulki kaž tenisowy bul. Dotalna rekordna malena z lěta 2020 bě 16,2 gramaj ćežka. Malena słuša k nowej družinje Eterna, kotruž bě ratarske předewzaće wuwiło, dokelž so ludźo pječa stajnje zaso za wulkimi płodami prašeja. Što ma so z rekordnej malenu stać, hišće njewědźa. Na brěčku předźěłać ju nochcedźa.
Tematiski tydźeń „mafia“ na gymnaziju w schleswigsko-holsteinskim Kronshagenje je bjezmała wulkozasadźenje specielneje jednotki policije zawinił. Swědk bě dźiwnje zdrasćeneho młodostneho z třělbu w ruce po puću do šule wobkedźbował. Jako přiwołani policisća widźachu, zo je cyła rjadownja „wobrónjena“, so změrowachu. Direktorej rjeknychu, zo njebě hesło tydźenja jara zbožowne.
Berlin (dpa/SN). Zwjazkowy sejm je dźensa znowa wo tym wuradźował, Ukrainu z modernymi němskimi raketami typa Taurus podpěrować. Unija CDU/CSU je k tomu wotpowědnu próstwu zapodała. W njej zwjazkowe knježerstwo namołwja, Ukrainje tute daloko sahace brónje „bjez komdźenja“ přewostajić. Zwjazkowy kancler Olaf Scholz (SPD) tole dotal wotpokazuje, dokelž by Němska tak na wójnje direktnje wobdźělena była.
Wilders njebudźe premier
Den Haag (dpa/SN). Nimale štyri měsacy po swojim wólbnym dobyću w Nižozemskej je so prawicarski populist Geert Wilders njewočakowano zastojnstwa ministerskeho prezidenta wzdał. Je to wuslědk rozmołwow z třomi dalšimi prawicarskimi stronami, kotrež chcedźa knježerstwo wutworić. Wilders rjekny, zo chcył ze swojim wotstupom nowemu prawicarskemu knježerstwu dźěło zmóžnić. W rozmołwach bě so pokazało, zo nima podpěru wšěch druhich stronow.
Scholz a Macron so zetkataj
Washington (dpa/SN). Wonkowny minister USA Antony Blinken je Israel znowa namołwjał, humanitarne połoženje w Gazaskim pasmje polěpšić a škit ciwilneje ludnosće zaručić. Prezident USA Joe Biden bě tohorunja zwuraznił, zo měło tole najwyšu prioritu měć. Najlěpši puć by přiměr był, Blinken rjekny.
Mjeztym je israelski zakitowanski minister Yoav Galant připowědźił, zo chcył wojersku ofensiwu přećiwo Hamas w Rafah na juhu Gazaskeho pasma bórze zahajić. Tam žiwori tuchwilu něhdźe 1,5 milionow ciwilistow na najwušim rumje a pod žałostnymi wuměnjenjemi, pytajo za wućekom w druhich kónčinach dospołnje zawrjeneho pasma. Israelske wójsko chce tutych ludźi do zahajenja wojowanjow na „humanitarne kupy“ w centrumje Gazaskeho pasma ewakuować.