Wažne znamjo runoprawneje zhromadnosće
Profesorka Viadriny Ines Härtel prěnja wuchodna Němka na Zwjazkowym wustawowym sudnistwje w Karlsruhe
Zwjazkowa rada je juristku na Viadrinje prof. dr. Ines Härtel minjeny pjatk jednohłósnje za sudnicu na Zwjazkowym wustawowym sudnistwje w Karlsruhe wuzwoliła. Lěta 1972 w NDRskim Staßfurće rodźena prawowědnica je tuž prěnja wuchodna Němka w najwyšim němskim zastojnstwje sudnika. Zdobom je wona najmłódša w najwyšim justicnym organje zwjazkoweje republiki, kotremuž přisłuša 16 sudnicow a sudnikow. Žony maja tam nětko wjetšinu. Wot lěta 2014 wuwučuje a slědźi prof. Ines Härtel na Europskej uniwersiće Viadrina w Frankfurće nad Wódru.
W Karlsruhe mějachu w Prěnim senaće městno sudnika znowa wobsadźić. „Ines Härtel je za zastojnstwo predestinowana. Wšako zaběra so tónle senat bóle z temami, kaž su to datowe škitne prawo, wěstota w interneće a digitalizacija“, wupraja so k tomu tuchwilny prezident Zwjazkoweje rady Dietmar Woidke (SPD). Jako braniborski ministerski prezident je so wón jara za nowu personaliju zasadźał.
Wulki zamołwity nadawk
Wo katalog chłostanjow šło
Saarbrücken (dpa/SN). W diskusiji wo noworjadowanje nadróžneho wobchadneho zakonika přewjedźechu wobchadni ministrojo zwjazkowych krajow dźensa widejowu konferencu. Mjeztym w 14 z cyłkownje 16 zwjazkowych krajow zaso stary katalog chłostanjow nałožuja, zdźěli rěčnik posaarskeho wobchadneho ministerstwa w Saarbrückenje. Zwjazkowe wobchadne ministerstwo bě minjeny tydźeń zdźěliło, zo ma nowe chětro razne postajenja za njepłaćiwe.
Seehofer rozprawu předstajił
Berlin (dpa/SN). Zwjazkowy nutřkowny minister Horst Seehofer (CSU) je dźensa w Berlinje rozprawu wustawoškita za lěto 2019 předstajił. Poprawom chcyše to hižo kónc junija činić, termin pak běchu wotprajili. W swojej kóždolětnej rozprawje wustawoškit wuwiće ekstremizma w Němskej a z nim zwjazane strachi za wšu towaršnosć posudźuje. Seehofer bě hižo před dnjemi rjekł, zo ma prawicarski ekstremizm za najwjetše wohroženja němskeje towaršnosće.
Warnuja před sćěhami blokady
Policija je dźensa na Rigaskej dróze w Berlinje wjacore bydlenja ...
Znowa protesty w Serbiskej
Běłohród (dpa/SN). W serbiskej stolicy Běłohrodźe a dalšich městach balkanskeho kraja je wčera wječor znowa k protestam přećiwo škitnym naprawam knježerstwa w zwisku z koronawirusom dóšło. Policija zasadźi sylzopłun a retle přećiwo demonstrantam, kotřiž mjetachu kamjenje a praskotaki na nju.
Hižo něšto dnjow trajace protesty měrja so přećiwo planowanym drastiskim wobmjezowanjam wšědneho žiwjenja po znowawudyrjenju pandemije. Prezident Aleksander Vučić bě drje za kónc tydźenja planowany zakaz, dom wopušćić, zaso zběhnył. Za to pak je nowe naprawy krizoweho staba knježerstwa připowědźił.
Za čas wuwzaćneho stawa wot měrca hač do meje bě bój přećiwo wirusej w Serbiskej wuspěšny. Mjeztym pak maja tam wšědnje 300 nowych infekcijow.
Škrička nadźije
Wiesbaden (dpa/SN). Dramatisce su němske eksporty koronakrizy dla tež w meji woteběrali. Přiwšěm maja zamołwići zaso škričku nadźije.
Hódnota wuwožowanych tworow drje je přirunujo z meju 2019 wo nimale 30 procentow na 80,3 miliardy eurow spadnyła, kaž Zwjazkowy statistiski zarjad we Wiesbadenje informuje. Porno aprylej, kiž bě dotal najšpatniši, pak je wuwoz tworow zaso wo dźewjeć procentow přiběrał. W jutrowniku běchu wo 31,1 procent mjenje eksportow zličili hač loni. To bě najrazniši spad po zahajenju statistiki wonkowneho wikowanja w lěće 1950.
Importow do Němskeje bě w meji přirunujo z lońšej meju wo 21,7 procentow mjenje, štož wučinja 73,2 miliardźe eurow.
Pólska kritizuje němske medije
Waršawa (dpa/SN). Po konflikće mjez pólskim statnym prezidentom Andrzejom Dudu a w Pólskej wuchadźacej bulwarnej nowinu, kotraž je zdźěla w němskim wobsydstwje, je sej wonkowne ministerstwo we Waršawje jednaćela němskeho wulkopósłanstwa skazało. Tam jemu rozłožichu, zo maja němske medije cyłu „seriju“ přinoškow, w kotrychž dźěłaja z manipulacijemi a łžemi. Tak wobsteji podhlad, zo chcyli demokratiski wólbny proces wobwliwować. Tomu so Waršawa raznje spjećuje, zdźěli zastupowacy wonkowny minister Pólskeje Szymon Szynkowski vel Sęk.
Andrzej Duda bě minjeny pjatk rozprawnistwo nowiny Fakt kritizował. Wona słuša po połojcy šwicarskemu medijowemu předewzaću Ringier a po połojcy němskemu nakładnistwu Axel Springer. Fakt bě rozprawjał, zo je Duda pedofilneho skućićela wobhnadźił. Při tym nasta pječa zaćišć, zo je Duda sam pedofilny. Tón rěčeše wo „němskim nadpadźe na wólby“.
Nabu: Tesla ma přirodu škitać
Dotal 373 zapodaćow přećiwo tworni elektroawtow pola Berlina
Grünheide (dpa/SN). Braniborski přirodoškitny zwjazk Nabu žada sej hladajo na planowane dalše trjebjenje lěsa na terenje twarca elektroawtow z USA Tesla škit zwěriny a rostlin. „Nam dźe wo to, zo Tesla škit družin zaruči“, rjekny krajny předsyda Nabu Friedhelm Schmitz-Jersch powěsćerni dpa. Trěbne su po jeho słowach „dobre a přiměrjene wurunanske naprawy“ za zasahi do přirody. Předsyda Nabu z toho wuchadźa, zo chce Tesla najzašo nazymu dalše štomy na terenje w Grünheidźe pola Berlina pušćeć, dokelž budźe potom čas lehnjenja nimo.
Tesla chce w juliju 2021 započeć elektroawta produkować. Po planach chcedźa kóždolětnje 500 000 awtow zhotowić. Kompletna přirodoprawniska dowolnosć za twar fabriki ze stron braniborskeho krajneho knježerstwa dotal hišće njepředleži. Tesla tuž twar najprjedy raz na swójske riziko přihotuje. Na 300 hektarow wulkej płoninje su dotal 92 hektarow lěsa wutrjebili.
Wjes wostanje – a nětk?
Budyski komitej žada sej wot šefa wopomnišćow wujasnjenje
Drježdźany (SN). Budyski komitej je jednaćela Załožby sakskich wopomnišćow Siegfrieda Reipricha napominał, zo by so wot swojich wuprajenjow nastupajo Stuttgartske krawale distancował. Tele krawale jenož jako „njelepe a zmylk woznamjenić, runočasnje pak skoržić, zo maja jeho kritikarjo pozdatnje wulki potencial so rozhorjeć a potrjeby skandalizować, trěbne dopóznaće bohužel njewotbłyšćuje“, rěka we wutornej zdźělence komiteja. Ze swojimi wuprajenjemi Reiprich jenož teror nacionalsocialistiskeje diktatury njezłahodnja, ale překroča tež hranicu, kotraž njeje akceptabelna.
Jednaćel mjenowaneje załožby je na Twitteru krawale w Stuttgarće z pogromom nacionalsocialistow 1938 přirunał: „Běše da to zwjazkowa kristalowa nóc abo ,jenož‘ juhozapadoněmska nóc črjopow (Scherbennächtle)?“ Tele słowa běchu rozhorjenosć po cyłej zwjazkowej republice zbudźili. Tež do toho hižo bě so Siegfried Reiprich do wulkich nadpismow dóstał. W nowinje Leipziger Volkszeitung mjenowaše wón swoje wuprajenja jako „njelepe a zmylk“.
To a tamne (09.07.20)
W běhu widejoweje konferency dušował je měšćanski radźićel w Španiskej, zabył je pak kameru hasnyć. Dokelž bě jemu konferenca z kolegami, žurnalistami a wobydlerjemi po wjace hač štyrjoch hodźinach wostudła, rozsudźi so Bernardo Bustillo w sewjerošpaniskim měsće Torrelavega za multitasking: dušować a druhim dale připosłuchać. Za to móžachu wšitcy přihladować, kak wón nahi pod dušu steji. Bustillo je mjeztym poskićił wotstupić, štož pak su wotpokazali.
Zhubjeny wupokaz bě paduchej w durinskim Sömmerda ze zahubu. 22lětny je we wobchodźe twory za 450 eurow zapakował a ćeknył, ale zhubi swój wupokaz. Jako so na to do wobchoda wróći, běžeše wón mjeztym přiwołanym policistam direktnje do rukow. Rubiznu namakachu zastojnicy w kerku.
