Krótkopowěsće (16.11.18)

pjatk, 16. nowembera 2018
artikl hódnoćić
(0 )

Synoda wuradźuje wo etaće

Drježdźany. Ćežišćo dźensa zahajeneho zeńdźenja synody Ewangelsko-lutherskeje krajneje cyrkwje Sakskeje je inkluzija. Nimo toho wuradźuja wo klětušim etaće. Naćisk předwidźi 226 milionow eurow. Porno lětsa wo wosom milionow eurow wjetša suma wuchadźa z wyšich dochodow cyrkwinskeho dawka, při­ražkow stata a financneho wurunanja Ewangelskeje cyrkwje Němskeje (EKD).

Rolf Hoppe njebohi

Drježdźany. Wjelelětny dźiwadźelnik Statneho dźiwadła Drježdźany a Němskeho dźiwadła Berlin Rolf Hoppe je za­wčerawšim 87lětny zemrěł. Mjezynarodny renomej zdoby sej Hoppe mjez druhim w róli Hermanna Göringa we filmje „Mephisto“ a jako kral w čěskej produkciji „Tři worješki za Popjelawku“. Hišće loni měješe wustup w rjedźe „Błótowski krimi“ telewizijneho sćelaka ZDF.

Elektrifikacija za lětdźesatkom

Drježdźany. Z internych podłožkow Němskeje železnicy wuchadźa, zo budu elektriske ćahi mjez Drježdźanami a Zhorjelcom najzašo w lěće 2029 dojězdźować. Wo tym su medije rozprawjeli. Klětu ma planowanje přednaćiska předležeć, 2024 chce žele­znica twarske naprawy wupisać a wot lěta 2026 do 2028 twarić.

Němska wubranka dobyła

Lipsk. Němska koparska narodna wubranka muži je wčera přećelsku hru přećiwo wubrance Ruskeje dobyło. W Lipsku přesadźi so mustwo trenarja Jogija Löwa z 3:0 (3:0). Wrota třělichu Leroy Sané­ wot Manchester City, Niklas Süle a Serge Gnabry wot FC Bayern Mnichow. Přichodnu winowatostnu hru změje němska wubranka póndźelu w Nations League přećiwo Nižozemskej.

Tajna testowa hra

Berlin. Druhi zwjazkowy koparski ligist 1. FC Union Berlin je so wčera w tajnym tesće přećiwo ligowemu konkurentej Dynamo Drježdźany z 1:1 dźělił. Wrota w stadionje Při starej Hajnkowni třělištaj Kenny Prince Redondo za Union a Baris Atik za Dynamo. Hra bě so bjez přihladowarjow přewjedła, dokelž sej to policija hladajo na riwalitu mjez fano­wymaj lěhwomaj tak žadaše.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND