W lěću 2018 sedźachu wolejbulisća Worklečanskeje Viktorije hromadźe při piwje, rěčachu wo zaměrach a šansach za nowe hrajne lěto we wobwodnej lize. Jednohłósny tenor diskusije bě: „To budźe jara ćežka naležnosć!“ Minjene lěta mjenujcy mějachu Worklečenjo takrjec abonement na titul wicemištra. Mnohim so zdaše, zo drje njebudu tajki wukon wospjetować móc. Staj dźě sylnaj hrajerjej Stephan Wjeńka a Jurij Lipič mustwo wopušćiłoj. Optimisća w mustwje pak sej prajichu: „Smy přeco hišće wukonliwi, mamy najlěpšeho přistajerja, sylneho diagonalneho nadběhowarja, mócnych wonkownych nadběhowarjow a angažowaneho libera. Dźěra w srjedźnym bloku pódla rutinowaneho kapitana dyrbimy z nowačkomaj wupjelnić. Kóžda pozicija pak je jeno z jednym hrajerjom wobsadźena.“ Moto za sezonu 2018/2019 tuž rěkaše: „Wostańće wšitcy strowi, potom mamy dobre prědnje městno zaručene.“