Hišće dźensa rěča w Delanach wo spěchowanskim myće za sportowe towarstwa we Wuchodosakskej, kotrež je Sokoł Ralbicy/Hórki w januarje 2007 dobył. Wulke mjena kaž Dynamo Drježdźany dyrbjachu so tehdy małym Sokołkam a Sokołam z Delan kłonić. Hišće dźensa je w Ralbicach rěč wo wosebitym tež přez wubědźowanje dobytym treningowym lěhwje w Ganzgrünje, na kotrymž smědźachu so 16 dorostowych hrajerjow a dwaj trenarjej w lěće 2006 wobdźělić. Filozofija serbskich sportowcow z gmejny Ralbicy-Róžant bě jury tehdy hnydom dwójce přeswědčiła. „Swójske talenty spěchować a doma w Delanach w prěnim a druhim mustwje hrać dać, to bě naš rozsudny trumf, kotryž smy tehdy wuhrali“, dopomni so bywši předsyda Sokoła Ralbicy/Hórki Pětr Hrjehor. Wón swjeći dźensa swoje 70. narodniny, na kotrež bychu zawěsće težo tójšto Sokołkow a Sokołow a dalšich sportowych přećelow přišli, tak zo njebychu městna doma w mjeztym dwuswójbnym domje w dobrej stwě dosahali.