Incidenca woteběrała
Budyšin. W Budyskim wokrjesu informowachu wčera wo 15 dalšich natyknjenych z koronu. Wot tuchwilu 1 567 schorjenych lěkuja 88 w chorowni. Tudyša sydomdnjowska incidenca na 100 000 wobydlerjow je po RKI dźensa 171,5. Wo 136 infekcijach rozprawješe wokrjes Zhorjelc. Tam zwěsćichu wčera dźewjeć dalšich padow z britiskej mutantu wirusa. Po RKI je incidenca dźensa 216,4.
Muzejowe myto wuwołane
Drježdźany. Muzeje swobodneho stata móža so wotnětka wo Sakske muzejowe myto powabić. Ministerstwo za wědomosć, kulturu a turizm w Drježdźanach spožči wuznamjenjenje lětsa wosmy raz. Nimo hłowneho myta w hódnoće 20 000 eurow přizwoli wosebitej po 5 000 eurach. Myto dóstałoj stej dotal mjez druhim Muzej zapadneje Łužicy w Kamjencu a Muzej Budyšin.
Dóstanu dalše pjenjezy
Rakecy. Leaderowy region Hornjołužiska hola a haty dóstanje hač do klětušeho dalše 3,6 milionow eurow za spěchowanje projektow w kónčinje. Prěnju namołwu, srědki požadać, su zamołwići wčera wozjewili. Rakečanski regionalny management tuchwilu spěchowansku dobu 2014–2020 wuhódnoća a přihotuje strategiju za lěta 2023 do 2027.
