Mnichow (kh/SN). Powěsć bě so dźeń po poražce Němcow přećiwo Jendźelskej šěriła: Toni Kroos zakónči swoju karjeru w narodnym koparskim mustwje Němskeje. Po bolostnej poražce přećiwo Jendźelskej je so 31lětny po 106 zasadźenjach w trikoće DFB za krok rozsudźił. Cyły koparski přiwisk pak tak jara zrudny njeje, Kroos njebě mjenujcy pola wšitkich woblubowany. Tež hdyž sej to hrajer Real Madrida jako profi wulce k wutrobje njebjerje, bu wón přez lěta přeco zaso kritizowany. Stajnje so dźiwaše, čehodla je w dwěmaj swětomaj žiwy.
W Španiskej, hdźež Kroos po swojej změnje wot FC Bayern Mnichowa wot lěta 2014 pola Real Madrid hraje, wobhladuja jeho jako jednoho z najlěpšich koparjow swěta. Tam maja jeho za mudreho strategu, kiž z inteligencu ćežke situacije zmištruje. Fakty rěča za Kroosa, kiž je w swojej karjerje štyri razy mištersku ligu dobył a njeličomne narodne titule. Zabyć njesměmy na titul koparskich swětowych mišterstwow w lěće 2014 w Brazilskej.