Wjesne koparske mustwo z Noweje Wjeski je wčera 44. swjatkowny koparski turněr w Pěskecach dobyło. W finalu přesadźichu so Nowowješćenjo po třělenju jědnatkow přećiwo Worklečanam. Małe finale wo třeće městno rozsudźichu Róžeńčenjo po třělenju jědnatkow z 3:2 přećiwo Sulšečanam. Turněr w Pěskecach dyrbješe so dwójce přetorhnyć, dokelž běštaj so hrajerjej z Róžanta a Noweje Wjeski zraniłoj. Nimo wuchowanskeju awtow dyrbješe so tež helikopter zasadźić. Woběmaj hrajerjomaj pak dźe so zaso lěpje. Jako najlěpšich koparjow turněra mytowachu zamołwići Sportoweje jednotki Pěskecy Sulšečana Kajusa Brězana, Smjerdźečana Aleksandera Cyža a Hórčana Milana Jurka. Tež njedźelu je so w Pěskecach hižo kopańca hrała, a to dorostowa. Wšitke 21 partijow nawjedowaše dorostowa trójka sudnikow: ,,Ja sym Pius Čornak a ja sudźu za SJ Njebjelčicy. Dźensa bě to za mnje skerje lochke, dokelž běše to turněr młodźinow E. Hrajerki a hrajerjo njejsu hišće tak agresiwni kaž pola C- abo B-młodźiny. A tohodla bě to hač na małke problemy z jednotliwymi hrajerjemi lochko.