Po lětomaj z dešćom swjatki njedźelu hodźeše so wjedro lětsa połnje k ludosportowemu dnjej w Němskopazličanskim sportowym centrumje. Na 41. Němskopazličanski swjatkowny sportowy swjedźeń přichwata 190 aktiwnych a 400 wopytowarjow. W 122. lěće wobstaća hrajachu so njedźelu wot 10 do 18 hodź. kopańcu a wolejbul. A kehelowanski sport steješe tež zaso na programje. Sportowi přećeljo zbliska a zdaloka zetkachu so ze starymi znatymi a přećelemi, kotřiž běchu sej tutón termin ekstra zaplanowali. Lětsa mějachu wosebje tež najmłódši rjane wjeselo z wodu za wochłódźenje.