Na 4. kristalowych běhach wčera w Běłej Wodźe je sej šulerka Serbskeho gymnazija Budyšin Leni Rublakec druhe městno w starobnej skupinje sk20 na čarje 5 kilometrow wudobyła. Dale bě na 32. Budyskich měšćanskich běhach sobotu w měsće Budyšan Miro Dreßler dobyćer šulerskeho běha na čarje 1,2 kilometraj. Sofija Dreslerec wobsadźi na čarje 3 kilometry štwórte městno. Na distancy 10 kilometrow bě Budyšan Syman Žur startował, wón doběža w sk35-39 jako druhi do cila.

Koparski cyłk starych knjezow Sokoła Ralbicy/Hórki měješe pjatk wječor na swójskim trawniku dale móžnosć sej wokrjesne mišterstwo 2026 wudobyć. Hižo w třećej mjeńšinje bě Stani Šewc za Ralbičanskich Sokołow po flance Sandra Žura 1:0 (3.) docpěł. Trenar Maik Brězan: ,,Nažel so to nam dźensa poradźiło njeje, my smy z Lubušom sylneho přećiwnika měli. Do hry smy w tabulce dypk předskoka měli, ale nažel w druhim połčasu wjac tak derje hrali njejsmy a dyrbjachmy njezbožowne napřećiwne wrota přijimać. Z tym smy na kóncu 1:2 (1:1) přěhrali a nimamy žanu šansu wjac ma mišterstwo.“