Awtor dźensa

Lukáš Novosad

Nowinarske prawidło praji: Hdyž nimaš aktualnu temu za kolumnu, nječiń sebi stres a pohladaj do stawiznow. Tam přeco zajimawu róčnicu abo podawiznu namakaš, na kotruž je so zabyło a kotruž móžeš zaso naspomnić. Nimo toho su sportowe stawizny mjenje znate hač powšitkowne politiske stawizny, štož slubi wjetše zabawjenje.

Tuž sym do zašłosće zhladował a woprawdźe sym něšto namakał, štož je za mnje absolutna nowostka: Přichodny tydźeń, wutoru 22. požnjenca,je sydomdźesat lět po zetkanju sportowych delegacijow NDR a ZRN we Weimarje zašło. Tam stej sej delegaciji dorěčałoj, zo zhromadne němske mustwo za olympiske hry w Melbourne zestaja. Hry su dwaj měsacaj pozdźišo zahajili. Za NDR su to wuznamne hry byli. Wšako je tam płuwarka Eva-Maria ten Elsen z cyłkownje 37 sportowcow za přeco hišće nowy stat prěnju medalju dobyła. Bě to bronzowa za disciplinu 200 m płuwanja na hrudźi.