Israel pomjezny přechod wobsadźił
Tel Aviv/Kairo (dpa/SN). Israelske wójsko je dźěle města Rafah na juhu Gazaskeho pasma wobsadźiło a tak strach před móžnej wojerskej ofensiwu zesylniło. Pomjezny přechod Rafah do Egyptowskeje na palestinskej stronje steji pod „operatiwnej israelskej kontrolu“, rěčnik wójska zdźěla. Na wobrazach je widźeć, kak israelske tanki pomjezny přechod docpěja. Ciwilisća a zastupnicy mjezynarodnych pomocnych organizacijow běchu kónčinu do toho wopušćili.
Israel bój přećiwo islamistiskej Hamas w Rafah hižo dlěši čas planuje. Mjezynarodnje so starosća, zo móhli ciwilisća wulku škodu poćerpjeć. Do potrjecheneje kónčiny w dospołnje zawrjenym pasmje je sej něhdźe milion ludźi wućeknyło. Najebać to je israelski wójnski kabinet wčera wobzamknył, z ofensiwu pokročować a tak wojerski ćišć na Hamas dale zwyšić, doniž njejsu wójnske zaměry docpěte. Mjeztym je Hamas swoje přihłosowanje k móžnemu přiměrej signalizowała. Namjet pak israelskim žadanjam njewotpowěduje, w Tel Avivje rěkaše.
Merz: CDU tu zaso je!
Předsyda chce ze swojej stronu po wólbach zwjazkoweho sejma na móc
Berlin (dpa/SN). CDU chcyše dźensa na swojim zjězdźe w Berlinje po 17 lětach zaso nowy zakładny program strony wobzamknyć. Z nim chce strona wobsahowe ponowjenje po poražce při wólbach zwjazkoweho sejma 2021 wotzamknyć. Nowy program sadźa na přikład w migraciskej politisce nowe akcenty. Jako hosća wočakowachu dźensa předsydu bayerskeje CSU Markusa Södera.
Delegaća běchu wčera předsydu strony Friedricha Merza a generalneho sekretera Carstena Linnemanna w zastojnstwje wobkrućili. Do toho bě Merz w bojowniskej narěči čłonow strony na nawrót k politiskej mocy w Němskeje nastajił. Za to běchu jemu delegaća rjap skrućili. Při wólbach předsydy dósta Merz nimale 90 procentow hłosow. Při wólbach 2022 bě wón 94,62 procentow dóstał. Merz dźakowaše so delegatam za „wulkotne znamjo dowěry“. Z tutej podpěru CDU přichodnej lěće, kotrejž budźetej naročnej, wšě nadawki zmištruje, bě sej Merz wěsty.
Zapal zjězda so minje
To a tamne (07.05.24)
Z prawymi woclanymi putami policista hrał je sydomlětny hólc w poruhrskim Herdecke – bjez klučika. Narunanski klučik njemóžachu na straži wohnjoweje wobory namakać, jako hólca z putami na jednej ruce přiwjezechu. Tež policija njemóžeše pomhać, dokelž so nowe klučiki do starych putow njehodźachu. Z wulkimi klěšćemi wuswobodźichu skónčnje hólca, kiž bě wšitko zmužiće znjesł.
Paducha přesćěhował a skónčnje dosahnył je 67lětny muž zhromadnje z policiju w Lipsku-Paunsdorfje. Muž bě wobkedźbował, kak so paduch přez rozbite wokno do jednoswójbneho domu zadobywa. Paduch ćekny, jako jeho 67lětny narěča. Swědk alarmowaše policiju a podhladneho sam přesćěhowaše. Na zastanišću tramwajki móžeše policija 57lětneho paducha zadźeržeć a zajeć. Tón měješe rubiznu hišće při sebi.
Nabožne swjedźenje
Berlin (B/SN). W róžowniku kopja so nabožne swjedźenje: Za buddhistow wotměje so wot 25. do 26. meje najwyši swjedźeń „Vesakh“ z chwalospěwanjom w templach na Buddhu, za židow započnje so 26. meje z Lag baOmer 49dnjowske žarowanje wo ludźi, kotřiž su při wšelakich zběžkach žiwjenje přisadźili. Na 33. dnju posćenje přetorhnu a zarjaduja wjesołe swjedźenje wokoło wohenja. Křesćenjo swjeća donjebjesspěće, swjatki a Bože ćěło.
Wobchad z KI
Rom (B/SN). Bamž Franciskus wobdźěli so jako prěni swjaty wótc wot 13. do 15. junija na wjerškowym posedźenju G7-statow w italskim Borgo Egnazia, zdźěli ministerska prezidentka Giorgia Meloni. Wona wočakuje, zo zamóže bamž jako hósć k etisko-kulturnym ramikowym wuměnjenjam při wužiwanju kumštneje inteligency (KI) bytostnje přinošować.
Žiwjenje bjez nabožiny
Biografija Simonoweje lětsa wuńdźe
Němski čerwjeny křiž w Sakskej je so składnostnje lětušich 200. narodnin z Dobruše pochadźaceje Marije Simonoweje na to dopomnił, zo běše wona prěnja sakska, z paskom čerwjeneho křiža na ruce zasadźena hladarka zranjenych na bitwišćach. Simonowa je jedna ze žonow, kotrež wosebita přehladka „Sotry we wójnje“ Sakskeho muzeja Čerwjeneho křiža w Beierfeldźe předstaji.
Beierfeld (SN/at). Wosebita přehladka „Sotry we wójnje“ je wobstatk Lěta Marije Simonoweje sakskeho DRK, podšmórnje André Uebe, nawoda Sakskeho muzeja Čerwjeneho křiža minjeny pjatk na wotewrjenju wustajeńcy. Tuž je logiske, zo muzejownicy z Dobruše pochadźacej Serbowce wulku kedźbnosć wěnuja. Mjez druhim su w jednej witrinje někotre z njej spožčenych rjadow widźeć.
Wustajeńca z wójnu Ruskeje přećiwo Ukrainje cyle aktualny poćah ma, prezident wokrjesneho zwjazka DRK Aue-Schwarzenberg Joachim Rudler wuzběhny: „Čłowjestwo wuknyło njeje, wójnje zadźěwać.“ W DRK płaći neutralnosć kóždemužkuli napřećo. To přehladka dokumentuje, zo by ludnosć tule zasadu lěpje słyšała a lěpje zrozumiła.
Scholz pola wojakow w Litawskej
Berlin (dpa/SN). Zwjazkowy kancler Olaf Scholz (SPD) je dźensa němskich wojakow w Litawskej wopytał. Tam wobdźěli so 10. tankowa diwizija na wulkim wojerskim manewru NATO. Na wojerskim zwučowanišću Pabrade wočakowaše Scholza litawski prezident Gitanas Nauseda. Rěčeć chcyštaj wobaj wo němskej brigadźe 4 800 wojakow, kotruž chcedźa jako reakciju na změnjene wěstotne połoženje a na wójnu Ruskeje přećiwo Ukrainje w Litawskej zaměstnić.
Xi Jinping na wopyće w Parisu
Paris (dpa/SN). Chinski statny a stronski šef Xi Jinping chcyše so dźensa na swojim wopyće we Francoskej z prezidentku komisije EU Ursulu von der Leyen a z francoskim prezidentom Emmanuelom Macronom zetkać. Po zetkanju w palasće Élysée chcyštaj sej Macron a Xi we wosobinskej rozmołwje stejišća wuměnić. Rěčeć chcyštaj Xi a Macron wo wójnje w Ukrainje a na Bliskim wuchodźe, wo hospodarstwje a wo škiće klimje.
Kwalitu lěkarjow pruwować
