Poprawom wšak zamołwitym w našim kraju ničo druheho njezwostanje, hač po tutym katastrofalnym lěće koronakrizy dla „kedźbliwje optimistisce“ na přichodne lěto zhladować. Zahajace so šćěpjenja přećiwo wirusej tomu bjezdwěla polěkuja. To zdawa so mnohim wone swětło na kóncu tunla być, hačrunjež nichtó njewě, kak serum w ćěle skutkuje a kak dołho wón potrjechenym škit před wirusom skića. We wšelakich wobłukach hospodarstwa pak so lětuša kriza tež klětu dale wuskutkuje. Njedawno mi twarski inženjer rozprawješe, zo to hižo nětko widźa. Předewšěm mjeńše nadawki w komunalnym wobłuku su wotpadnyli: Tule nowa dróha, tam nowy móst abo nowe busowe zastanišćo. Komunalne etaty su pobrachowacych dochodow dla tak wučerpane, zo klětu za inwesticije prosće žane pjenjezy nimaja. A byrnjež wša ludnosć w běhu lěta 2021 woprawdźe šćěpjena była a so połoženje zaso změrowało, traje drje hišće ­dołho hač k normaliće. Marko Wjeńka

Podstupim (dpa/SN). Zo móhli sćěhi zawrjenjow koronapandemije dla lěpje zmištrować, je Inwesticiska krajna banka Braniborskeje (ILB) wjace hač 6 000 předewzaćelam w kraju podpěru wupłaćiła. Mjez nimi je 1 500 tak mjenowanych solo-samostatnych, kotřiž dóstachu hač do 5 000 eurow. Podźěl nowemberskeje pomocy dósta nimo toho 4 300 předewzaćelow, kotřiž běchu próstwu wo podpěru přez portal Zwjazka wotedali.

Cyłkownje je ILB 33 milionow eurow na dobro samostatnych a předewzaćelow přepokazała, najwjace 10 000 eurow. Mjeztym su sumu na 50 000 eurow zwyšili a chcedźa ju woprawnjenym firmam dopłaćić, z čimž chcedźa hišće lětsa započeć. Spočatk januara budźe wobdźěłanje tež internetnje móžne. Šef předsydstwa banki Tillmann Stenger prosy předewzaća wo sćerpnosć. Ručež Zwjazk techniske wuměnjenja wutwori, chcedźa nakopjene próstwy spěšnje wotdźěłać.

Tak mjenowanu nowembersku pomoc wupłaća předewšěm gastronomiskim zawodam, kotrež dyrbjachu zawrěć. Jim zarunaja 75 procentow wobrota, kotryž mějachu w nowembru 2019.

Pilneho „hodowneho palčika“ su policisća w braniborskim Werderu nad Habolu patoržicu wječor wustróžili. Wobydlerka bě zastojnikow alarmowała, dokelž bě w parkowacym transporteru elektriski šrubowak słyšała. Tukajo na padustwo chwatachu zastojnicy k městnu a nańdźechu w awće 27lětneho, kiž w poslednim wokomiku dary za swójbu pasleše. Zasadźenje skónči so z posměwkom.

Dźesaćlětny hólc je prěni dźeń hód z awtom přiwuzneho po Rotterdamje jězdźił, doniž jeho policist njezadźerža. Zastojnikej bě mały šofer napadnył, kotrehož hłowa lědma nad wodźidło sahaše. Wobsedźer awta na pódlanskim sedle rozłoži, zo je hólc přez hody z Rumunskeje přijěł. Dokelž hižo derje z awtom jědźe, bě wón dźěsću jězbu po měsće popřał. Policija piše, zo so „ničemu wjace njedźiwa“ a zo płaći akcija wobsedźerja 280 eurow.

Washington (dpa/SN). Amtěrowacy prezident USA Donald Trump je sej polěpšenje na z wulkej wjetšinu w kongresu wobzamknjenym konjunkturnym pakeće koronapandemije dla žadał. Schwalene naprawy mjenowaše wón „hańbu“ a hrožeše, zo zrěčenje we wobjimje 900 miliardow dolarow njepodpisa. Jónkrótne wupłaćenje 600 dolarow na wosobu měło so na 2 000 dolarow zwyšić, sej Trump žadaše. Republikanojo a demokraća běchu so po wobćežnych jednanjach na konjunkturny paket dojednali.

Šoferojo přiběracy hněwni

Dover (dpa/SN). W jendźelskim přistawnym měsće Doveru je k rozestajenjam mjez čakacymi šoferami nakładnych awtow a policiju dóšło. Hněwni šoferojo běchu zastojnikow wuhwizdali a do nich storkali, medije rozprawjeja. Do toho bě Francoska Wulkej Britaniskej zdźěliła, zo smědźa nakładne awta zaso do Francoskej přijěć, maja-li šoferojo negatiwny test na koronu při sebi. Francoska bě njedźelu noweje formy koronawirusa w Jendźelskej dla mjezy zawrěła.

Žane přechwatane šćěpjenje