Krótkopowěsće (22.11.21)

póndźela, 22. nowembera 2021 spisane wot:

Razantny postup natyknjenjow

Budyšin. W Sakskej je zjawne žiwjenje wot dźensnišeho jara wobmjezowane. Přičina su razantnje stupace ličby koronainfekcijow. RKI je za kónc tydźenja w Budyskim wokrjesu 1 288 infekcijow registrował. Incidenca 1 474,4 je tu třeća najwyša jednoho wokrjesa w Němskej. Za wokrjes Zhorjelc mjenowaše RKI 907 natyknjenjow, tam wučinja incidenca 704,8. Čitajće tež na stronje 2.

Zarjadowanja wotprajene

Bukecy/Budyšin. Pandemije w Sakskej dla stej Ludowe nakładnistwo Domowina a Serbske ewangelske towarstwo přichodnu sobotu w Bukecach planowane čitanje z Měranu Cušcynej wotprajiłoj. Čitanje ma so nalěto přewjesć. Němsko-Serbske ludowe dźiwadło kaž tež Serbski ludowy ansambl stej aktualnych sakskich prawidłow dla wot dźensnišeho hač do 12. decembra wšitke planowane předstajenja wotprajiłoj.

Namjet serbskeje rady

Krótkopowěsće (19.11.21)

pjatk, 19. nowembera 2021 spisane wot:

Natyknjenja njepopušćeja

Budyšin. Docpěteho schodźenka přećeženja w sakskich chorownjach dla płaći wot dźensnišeho w mnohich wobłukach rjadowanje 2G. Incidenca po RKI wučinja w Budyskim wokrjesu 804. Tam su wčera za minjenej dnjej wo 1 923 natyknjenjach z koronawirusom informowali. We wokrjesu Zhorjelc běchu w samsnym času 442 infekcijow a dwaj smjertnej padaj. Incidenca po RKI je tam dźensa 334,9.

Dobyćerjej wurisanja Kocor 2.0

Budyšin. W kompozitoriskim wurisanju Kocor 2.0 Towaršnosće za spěchowanje Serbskeho ludoweho ansambla je jury dobyćerjow pomjenowała. Prěnje myto spožča Kulowčanej Lukasej Čórlichej za twórbu „Njesmjertnosć“ za orchester a sopran-solo, třeće myto Dennyjej Hozmanej z čěskich Liběšic za twórbu „Nadźija, lubosć, wěra“, spisanu za solo-spěw z klawěrnym přewodom. Druhe myto ­jury njespožča.

Wo čěskich Němcach

Krótkopowěsće (18.11.21)

štwórtk, 18. nowembera 2021 spisane wot:

Wojacy z Bayerskeje pomhaja

Budyšin. Z hódnotu 966 je incidenca po Roberta Kochowym instituće dźensa w Budyskim wokrjesu druhi dźeń za sobu pod tysac. Za wokrjes Zhorjelc poda RKI dźensa 561,9. Mjeztym pomhaja wojacy Zwjazkoweje wobory w Budyskim krajnoradnym zarjedźe kontakty z koronawirusom natyknjenych zwěsćić. Předwčera­wšim informowachu tu wo 627 natyknjenjach a wo jednym smjertnym padźe, w Zhorjelskim wokrjesu bě 355 infekcijow.

Namjet za dwurěčne tafle

Budyšin. Domowina wita informaciju zwjazkoweho zarjada za kartografiju, zo chce stajny wuběrk za geografiske pomjenowanja zwjazkowemu ministerstwu za wobchad namjetować, tafle na awtodróhach w sydlenskim rumje Serbow přichodnje dwurěčnje, němsce a serbsce, pomjenować. Namjet chce zarjad podać, ručež budźe nowe zwjazkowe knježerstwo wutworjene.

Druha dźěćaca kniha Źilki

Krótkopowěsće (16.11.21)

wutora, 16. nowembera 2021 spisane wot:

Incidenca dale nad tysac

Budyšin. Z 1 053 je incidenca po Roberta Kochowym instituće dźensa w Budyskim wokrjesu dale nad tysac. Wot minjeneho pjatka su tu wo 962 wobkru­ćenych natyknjenjach z koronawirusom a štyrjoch smjertnych padach informowali. Za samsnu dobu je wokrjes Zhorjelc wčera wo 882 infekcijach a wo dwěmaj ze­mrětymaj rozprawjał. Incidenca tam wučinja po RKI dźensa 783,5.

Schadźowanka znowa online

Budyšin. Hladajo na tučasne wobstejnosće a naležne poručenje krajnoradneho zarjada Budyšin je so přihotowanski wuběrk rozsudźił, schadźowanku lětsa znowa w digitalnym formaće přewjesć. Hižo zestajany kulturny program móža zajimcy online sćěhować, kaž Załožba za serb­ski lud zdźěli.

Němske ćahi w sewjernej Čěskej

Liberec. Na hłownej železniskej čarje Liberecskeho kraja budu wot 12. de­cem­bra moderne ćahi Trilex němskeho wobchadneho předewzaća Die Länderbahn zasadźene. Runje podpisane zrěčenje nastu­­pa trasu Mladá Boleslav – Česká Lípa­ – Rumburk. Klětu chcyło předewzaće tež čaru Liberec – Česká Lípa – Děčín přewzać.

Z dypkom so z Běłeje wróćili

Krótkopowěsće (15.11.21)

póndźela, 15. nowembera 2021 spisane wot:

Třeća najwyša incidenca

Budyšin. Z incidencu 1 197,3 po Roberta Kochowym instituće ma Budyski wo­krjes dźensa třeću najwyšu hódnotu po cyłym Zwjazku. Minjeny pjatk rozprawjachu tam wo 741 natyknjenjach z koronawirusom. We wokrjesu Zhorjelc zwěsćichu samsny dźeń 431 infekcijow a wosom smjertnych padow w času 5. do 11. nowembra. Incidenca po RKI je tu dźensa 848,1.

Myto Dankej Handrikej

Brno. Přinošk Danka Handrika a Christiana Gramstadta ze sćelaka ARD „Wikowanje z chcyćiwosću – bój Čěskeje pře­ćiwo crystalej meth“ bu minjeny pjatk w Brnje z Němsko-Čěskim žurnalistiskim mytom 2021 w kategoriji multimedija wuznamjenjeny. Z přinoškom pledujetaj wobaj žurnalistaj za debatu bjez tabuwow nastupajo drogu crystal meth.

Nowy hudźbny widejo

Krótkopowěsće (12.11.21)

pjatk, 12. nowembera 2021 spisane wot:

Žanežkuli wotpjeće

Budyšin/Zhorjelc. W Budyskim wo­krjesu je so dalšich 627 ludźi z korona­wirusom natyknyło. Dwaj schorjenej staj zemrěłoj. Incidenca po Roberta Kochowym instituće je tu 823,5. W Zhorjelskim wokrjesu zwěsćichu 466 nowych infekcijow a dwaj smjertnej padaj. Incidenca tam wučinja 622,2.

Jewišćowy bal wotprajeny

Budyšin. Němsko-Serbske ludowe dźiwadło přesunje „na nuznu próstwu Budyskeho krajnoradneho zarjada“ jutře a zajutřišim planowany jewišćowy bal. Přihotowany swjedźenski program „Sherlock Holmes und der Theatergeist“, wuhotowany wot cyłeho hrajerskeho ansambla domu a wot baleta Serbskeho ludoweho ansambla, přiwšěm pokazaja, a to wobaj dnjej w 19.30 hodź.

Čěska pyta „narodneho ptaka“

Praha. Nimo chutnych dypkow namakaš w programatiskim wozjewjenju noweje čěskeje knježerstwoweje koalicije tež jedyn trochu směšny. Po nim měł sej kraj (po přikładźe ameriskeho worjoła, galiskeho honača abo jendźelskeho ročka) tež swójski ptači symbol wuzwolić. Wuběrk maja ornitologojo přihotować, wo wuslědku pak měli wuknjacy zakładnych šulow rozsudźić.

Krótkopowěsće (11.11.21)

štwórtk, 11. nowembera 2021 spisane wot:

„Eksponencielny rozrost“

Budyšin/Zhorjelc. Wokrjes Budyšin infor­muje, zo mnóstwo natyknjenjow z koronawirusom „eksponencielnje přiběra“. Wčera zwěsćichu 853 nowoinfekcijow, incidenca tu je po Roberta Kochowym instituće 769,1. W Zhorjelskim wokrjesu zličichu 466 dalšich natyknjenjow a tři smjertne pady. Incidenca tam wučinja aktualnje 533,6.

Astronawća skónčnje wotlećeli

Cape Canaveral. Po wjacekróć špatneho wjedra dla přesunjenym terminje je ISS-ekspedicija 66 zaběžała. Dźensa rano wotleća raketa typa Falcon 9 ze swětnišćowej łódźu Crew Dragon z Floridy. Mjez astronawtami, kotřiž wotnětka poł lěta na swětnišćowej staciji ISS přeby­waja, je tež Němc Matthias Maurer.

Modelowy koncept pře koronu

Krótkopowěsće (10.11.21)

srjeda, 10. nowembera 2021 spisane wot:

Rozdźělne wuwiće

Budyšin/Zhorjelc. Incidenca w Budyskim a Zhorjelskim wokrjesu so rozdźělnje wuwiwa. Po RKI je wona w Budyskim dźensa na 648 lochce postupiła, w Zhorjelskim wokrjesu pak na 468,6 spadnyła. W Budyskim wokrjesu zwěsćichu 440 natyknjenjow, 102 pacientaj staj w chorowni. Wokrjes Zhorjelc informuje wo 123 nowoinfekcijach, 133 wosobow lěkuja w chorownjach, 13 z nich intensiwnje.

Dóstanjetaj myto w Oslu

Stockholm. Lawreatow Měroweho Nobeloweho myta Mariju Ressa a Dmitrija Muratowa su najebać koronu na wosobinske počesćenje do Osla přeprosyli. Žurnalistaj z Filipinow a Ruskeje dóstanjetaj myto 10. decembra, kaž załožba Nobeloweho myta dźensa zdźěli. Wšitcy dalši pak přijimuja počesćenja w swojim kraju.

Walter Niklaus njeboh

Krótkopowěsće (09.11.21)

wutora, 09. nowembera 2021 spisane wot:

Wjace stacionarnych pacientow

Budyšin/Zhorjelc. „Štwórta žołma“ ko­rona­­pandemije wuskutkuje dźeń a wjace natyknjenjow. Incidenca w Budyskim wokrjesu je po Roberta Kochowym instituće (RKI) dźensa 645,3. Tuchwilu 99 pacientow stacionarnje (+14) lě­kuja, dwaj staj zemrěłoj. W Zhorjelskim wokrjesu wučinja incidenca po RKI aktualnje 581,1. Tam so w chorownjach wo 119 pacientow (+27) staraja.

Rěča wo folkloriadźe

Budapest. Mjezynarodna organizacija za přewjedźenje folklornych festiwalow (CIOFF) je jubilejny 50. kongres zahajiła. W Budapesće rozjimuje hač do pjatka do­hro­mady 145 wobdźělnikow z 49 čłonskich krajow mjez druhim nutřkowne naležnosće organizacije a chartu za dźěćacu folkloriadu, kaž jednaćel Domowiny a serbski delegat Marko Kowar zdźěli.

Pruwuja 66 projektowych idejow

Krótkopowěsće (08.11.21)

póndźela, 08. nowembera 2021 spisane wot:

Incidenca dale wysoka

Budyšin/Zhorjelc. Incidenca we wo­krjesu Budyšin njeje so přez kónc ty­dźenja změniła a je po informacijach RKI dale na wysokim stawje 487,2. W Budy­skim wokrjesu tučasnje 85 schorjenych w chorowni lěkuja. W Zhorjelskim, hdźež je incidenca na 590,3 postupiła, so wo 92 pacientow stacionarnje staraja.

Zaso w předsydstwje MENS

Lorient. Młodźinske towarstwo Pawk je po nimale lěće zaso w předsydstwje Młodźiny europskich narodnych mjeńšin (MENS) zastupjene. Kaž Pawk zdźěli, bu­štaj Krystof Grofa a Felicia Touvenotec sobo­­tu na wurjadnej hłownej zhromadźi­znje MENS w Lorienće do gremija wu­zwolenaj. Grofa je městopředsyda za eksterne naležnosće, Touvenotec nawjeduje dźěłowu skupinu Member Integration.

„Meja“ jako wumolowanka

Chróšćan Šulerjo

nowostki LND