Krótkopowěsće (13.01.16)

srjeda, 13. januara 2016 spisane wot:

Přihoty za Dźeń Saksow zahajene

Lubij. W Lubiju su hižo započeli Dźeń Saksow 2017 přihotować. To wuhotuje město najwjetši ludowy swjedźeń swobodneho stata. Za přihot wutworichu sydom dźěłowych skupin. Hruby koncept po słowach wyšeho měšćanosty Dietmara Buchholza (njestronjan) steji, maskotku w formje Lubijskeje wěže hižo maja.

W januaru mjenje ćěkancow

Budyšin. Po informacijach Budyskeho krajnoradneho zarjada přińdźe tónle měsac jeno 150 ćěkancow do Budyskeho wokrjesa. Telko bě zwoprědka na tydźeń planowanych. We wokrjesu maja tuchwilu za nich 3 400 městnow. 250 z nich hodźi so hnydom wužiwać, zo móhli přichadźacych hnydom zaměstnić. Tučasnje bydli w Budyskim wokrjesu něhdźe 3 000 požadarjow azyla.

Praski hród sylnišo stražować

Praha. Hladajo na aktualne wěstotne połoženje a na strach terorizma chcedźa Praski hród jako sydło prezidenta přichodnje bóle wobstražować. Tuchwilnu stražu 200 policistow chcedźa wo dalšich sto zastojnikow zesylnić, kaž čěski nutřkowny minister Milan Chovanec zdźěli. Nimo toho ma so na Hrodźe nowy system kamerow zatwarić.

Krótkopowěsće (12.01.16)

wutora, 12. januara 2016 spisane wot:

Pólska reaguje „zadźiwana“

Waršawa. Dźeń do wuradźowanja komisije EU wo połoženju w Pólskej je justicny minister kraja Zbigniew Ziobro w zjawnym lisće kritiku Europskeje unije na najnowšich zakonskich rjadowanjach w Pólskej wotpokazał. W spisu wicešefej komisije Fransej Timmermansej zwuraznja Ziobro swoje „zadźiwanje“ na postupowanju EU, pokazujo na suwerenosć a samostatnosć Pólskeje.

„Gutmensch“ njesłowo lěta 2015

Darmstadt. Němske zapřijeće „Gutmensch“ je „njesłowo lěta 2015“, zdźěli komisija w Darmstadće, kotraž tole rozsudźa. Słowo wužiwaja w zwisku z ćěkancami, zo bychu pomocnikow pawšalnje jako naiwnych, hłupych a swětacuzych difamowali, rěka we wopodstatnjenju. Je to­ mjeztym 25. njesłowo. Loni běchu „Lügenpresse“ wuzwolili.

Za strowši zakusk na šulach

Krótkopowěsće (11.01.16)

póndźela, 11. januara 2016 spisane wot:

Zetkanišćo Reimann zawěsćene

Wojerecy. Z městnomaj je zastaranje Zetkanišća Brigitty Reimann hač do lěta 2018 dźakowano podpěrje města Wojerec a spěchowanskeho programa agentury za dźěło zawěsćene, kaž předsyda Wojerowskeho wuměłstwoweho towarstwa Martin Schmidt na sobotnej hłownej zhromadźiznje podšmórny. Dotalne předsydstwo su tam wobkrućili.

Z nowym wjedniswtom

Radwor. Serbske młodźinske towarstwo Pawk ma nowe předsydstwo. Kaž wone hakle sobotu na swojim blogu wozjewi, bě­chu je 30. decembra w Radworju wuzwolili. Nowa předsydka Pawka je Chasowčanka Franciska Grajcarekec. Dale­ wuzwoli­chu młodostni na njezjawnej hłownej zhromadźiznje Alenu Pawlikec, Ludmilu Kowarjec a Fabiana Šěraka do předsydstwa.

David Bowie zemrěł

London. Rockowy hudźbnik David Bowie je njeboh. Wón zemrě dźensa 69lětny w kruhu swójbnych, po tym zo bě 18 měsacow přećiwo schorjenju raka wojował, jeho syn dźensa internetnje zdźěli. Bowie bě jedyn z najwuznamnišich hudźbnikow minjenych lětdźesatkow. Hakle minjeny pjatk bě jeho nowy album wušoł.

Krótkopowěsće (08.01.16)

pjatk, 08. januara 2016 spisane wot:

Wokrjes dyrbi lutować

Zhorjelc. Deficita wosom milionow eurow dla je Zhorjelski wokrjes etat zawrěł, wozjewi přirjadnik krajneho rady Thomas Gampe. Minus wokrjesa je wuskutk mjenje dochodow z komunalneho financneho wurunanja kaž tež wyšich wudawkow we wobłuku młodźinskeje pomocy. Tuchwilu zdźěłuje wokrjes dodatne wustawki za wokrjesny etat kaž tež hospodarski strukturny koncept.

Łužiske wjelki tež w filmje

Doksy. Wjelča črjóda, žiwa w sewjeročěskej škitanej přirodnej kónčinje Kokořínsko-Máchův kraj, ma po zdźělenju hibanja DUHA Olomouc znajmjeńša sydom skoćatow inkluziwnje dorosta. Tole su fotowe pasle njedawno zapopadnyli. Wo nawróće wjelkow, kotrež běchu z Łužicy do Čěskeje přišli, su mjeztym dokumentariski film nawjerćeli.

Podhladneju zajeli

Krótkopowěsće (07.01.16)

štwórtk, 07. januara 2016 spisane wot:

„Mein Kampf“ w šuli wužiwać

Drježdźany. Nowa komentowana kniha Hitlera „Mein Kampf“ hodźi so jako historiske žórło na šulach Sakskeje wužiwać, zdźěli rěčnica kultusoweho ministerstwa. W tym zwisku poruča wone hišće dalše knihi a wšelaku literaturu wučerjam. „Mein Kampf“ móhł k tomu přinošować, ideologiju nacionalsocializma wotkryć a šulerjow přećiwo prawicarstwu skrućić. Kniha bě 70 lět zakazana.

Wjace pjenjez rjedźerjam

Budyšin. Rjedźerki a rjedźerjo Budyskeho wokrjesa dóstanu nětko wjace pjenjez. Tole zdźěla industrijne dźěłarnistwo Twar-wobswět-ratarstwo. 1 320 rjedźerjam twarjenjow a woknow płaća wot 1. januara 8,70 eurow na hodźinu, 20 centow wjace hač dotal. Klětu ma dalše zwyšenje slědować.

Wjele mortwych w Libyskej

Tripolis. Při sebjemordarskim atentaće na wukubłanske lěhwo policije w zapadnej Libyskej su dźensa po informacijach statneje powěsćernje Lana znajmjeńša 50 ludźi morili a 127 zranili. Po prěnich informacijach bě z rozbuchlinu nakładowane awto blisko skupiny policistow rozbuchnyło. W lěhwje wukubłuja čłonow mórskeje straže.

Krótkopowěsće (06.01.16)

srjeda, 06. januara 2016 spisane wot:

Loni 1,1 milion ćěkancow

Berlin. Do Němskeje je loni nimale 1,1 milion ćěkancow přišło, 428 500 z nich ze Syriskeje. Tole zdźěli zwjazkowe nutřkowne ministerstwo dźensa w Berlinje. Dalši škit pytacy běchu z Afghanistana (154 000) a z Iraka (122 000) kaž tež z Albanskeje a Kosowa. Dotal předleži w Němskej 476 700 próstwow wo azyl, telko kaž hišće nihdy.

Přidatni wojacy do Malija

Berlin. Zwjazkowa wobora ma so hišće sylnišo w boju přećiwo teroristiskej milicy Islamski stat zasadźić. Zwjazkowe knježerstwo je dźensa wobzamkło, 550 přidatnych wojakow do zapadoafriskeho Malija pósłać, zo bychu tam při wukubłanju armeje pomhali. Dotal je jenož mało němskich wojakow w stolicy Bamako zasadźenych.

Lěkarjow na wsy wabić

Praha. We wotležanych, nakromnych kónčinach a na wsach Čěskeje republiki pobrachuja lěkarjo za powšitkownu medicinu. Strowotniske ministerstwo chce jich nětko zaměrnje wabić a pjenježnje motiwować, kaž čěske medije rozprawjeja. Tak planuja mjez druhim, lěkarjam w słabje wobsydlenych kónčinach běžnu mzdu z faktorom 1,3 zwyšić.

Hingst z nowym nadawkom

Krótkopowěsće (05.01.16)

wutora, 05. januara 2016 spisane wot:

Pjenjezy Zwjazka za Łužicu

Podstupim. Braniborska SPD sej žada, zo měło zwjazkowe knježerstwo w padźe spěšneho kónca wudobywanja brunicy Łužicu pjenježnje podpěrać. Wotpowědnu namołwu je krajne předsydstwo wobzamknyło, kaž powěsćernja dpa rozprawja. Ministerski prezident Dietmar Woidke (SPD) potwjerdźi, zo je strukturna změna jenož tak zwoprawdźomna.

Wjace bjezdźěłnych w decembru

Nürnberg. Ličba bjezdźěłnych w Němskej je w decembru wo 48 000 na nětko 2,681 milionow rozrostła. Kwota bjezdźěłnosće zwyši so na 6,1 procent. Hłowna přičina je zymski počas, Zwjazkowa dźěłowa agentura dźensa zdźěli. Wuwiće na dźěłowych wikach je při­wšěm pozitiwne, rjekny šef agentury w Nürnbergu Frank-Jürgen Weise.

Zwučowanišćo nětko přistupne

Krótkopowěsće (04.01.16)

póndźela, 04. januara 2016 spisane wot:

Nowe wotewrjenske časy

Budyšin. Cyłkownje 23 filialow Budyskeje wokrjesneje lutowarnje ma wot dźensnišeho nowe wotewrjenske časy. Časy serwisa a kasow so přikrótša a časy poradźowanja podlěša. Takle reaguje lutowarnja na to, zo dźeń a wjace wužiwarjow jeje posłužbow bankowe zwiski online pěstuje. Nowe wotewrjenske časy so na personal njewuskutuja, kaž wjed­nistwo lutowarnje zdźěla.

Chorownja dale rosće

Niska. Dalše inwesticije za Nišćansku Emmausku chorownju su wěste. Planowany je lětsa hišće přitwar za nuzowu ambulancu. Wobhospodarjer chorownje – Drježdźanski wustaw diakonisow – chce za to dwaj milionaj eurow wudać. Nišćanska chorownja ma tuchwilu 190 sobudźěłaćerjow.

Citycenter dale w ruce města

Grodk. Cityjowy center (CCS) w Grodku wostanje w ruce města. Nowa mějićelka budźe lětsa towaršnosć Spree-Insel, kaž předewzaće informuje. Wone chce hromadźe z městom objekt z drobnowikowanjom, posłužbami, kulturu a gastronomiju wuspěšnje dale wjesć. Jednaćelej Ronnyjej P. Schusterej su zajimy nutřkowneho města wažne.

Peter Prevc přesylny

Krótkopowěsće (30.12.15)

srjeda, 30. decembera 2015 spisane wot:

Wotměja dźaknu party

Drježdźany. „Sakska so dźakuje“, takle rěka party 9. januara 2016 w Małym domje Statneho činohrajneho dźiwadła Drježdźany. Z njej chce so sakske ministerstwo za wědomosć a wuměłstwo zhromadnje z konferencu sakskich studentskich zjednoćenstwow a statnym činohrajnym dźiwadłom studowacym za čestnohamtsku pomoc při přijimanju, zastaranju a integraciji ćěkancow dźakować. Mjez dźakowacymi budźe statma ministerka dr. Eva-Maria Stange (SPD).

Mia a Ben cyle prědku

Hamburg. Po cyłej Němskej je Mia wo­spjet najlubše holče předmjeno. Na druhim městnje steji Emma, na třećim Hannah/Hanna. Najwoblubowaniše hólče mjeno je Ben. Jonas a Leon zaběratej dalšej městnje. To rjekny hobbyjowy slědźer mjenow Knud Bielefeld powěsćerni dpa. Mia a Ben běštej mjenowej lisćinje hižo minjene lěta nawjedowałoj.

Zhromadna meditacija

Krótkopowěsće (29.12.15)

wutora, 29. decembera 2015 spisane wot:

65 000 policistow škita Pegidu

Drježdźany. Za zawěsćenje pochodow Pegidy, Legidy a Pegidy Kamjenica-Rudne horiny bě wot 20. oktobra 2014 hač do lětušeho 7. decembra 65 000 policistow zasadźenych. To wuchadźa z wotmołwow sakskeho statneho knježerstwa na wjacore naprašowanja zapósłanca krajneho sejma Andréja Schollbacha (Lěwica). Najwjetša zestawa bě 21. januara w Lipsku z 5 100 zastojnikami.

Vietnamjenjo a čěske hody

Praha. W Čěskej republice bydlacy Vietnamjenjo pěstuja dźeń a bóle rjad čěskich hodownych nałožkow, byrnjež přewažnje buddhisća byli. Tak mnozy doma štomik pyša abo přihotuja typiske čěske jědźe a słodkosće. Za něhdźe 5 000 vietnamskich katolikow su tež Bože mšě w jich maćeršćinje zawěsćene. W Čěskej bydli wjace hač 60 000 Vietnamjanow.

Wobmyslenja zapodać

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND