Tereza Pöpelec z Chrósćic šulski rekord polěpšiła
Při suchim a zdźěla słónčnym wjedrje wotmě so wutoru tydźenja tradicionalne wubědźowanje Serbskeho gymnazija Budyšin (SGB) w lochkoatletice na Młynkec łuce. Šulerjo zwěsćichu swojich najlěpšich sportowcow w běhanju, dalokoskoku, mjetanju bulika a kulostorku. Najprjedy wojowachu holcy a hólcy 5. do 8. lětnika wo najlěpše rezultaty. Fridjof Schade z rjadownje 8-2 docpě z 308 dypkami najlěpši wukon dopołdnja a třeći najlěpši cyłeje šule. Slědowaše sobušulerka Lea Krječmarjec, wurjadna koparka a volleyballistka, z 252 dypkami. Aktiwna běharka na srjedźne a dlěše distancy Larissa Měrćinkec z rjadownje 7-1 bě z 234 dypkami třeća najwuspěšniša našich młódšich sportowcow. Prjedy hač podachu so lětniki 5 do 8 domoj, wotmě so hišće woblubowany staflowy běh (stajnje štyri holcy a štyrjo hólcy z jedneje rjadownje) na 400 metrow.