Pola Nukec w Budyšinje hraje nětko hižo někotre lěta billard wulku rólu. Nan Michał hraje hromadźe ze synom Janošom w towarstwje. 17lětny talent je w swojich młodych lětach hižo tójšto wuspěchow žnjał a z nanowej podpěru dale na jara wuspěšnym puću. Jurij Bjeńš je so z woběmaj wo nakromnej sportowej družinje rozmołwjał.
Janošo, kak dołho hraješ hižo billard a kak sy k tomu přišoł?
J. Nuk: Hraju nětko hižo šěsć lět billard. Poprawom běch lochkoatlet, nažel pak mějach ćeže z nohu a po wjacorych operacijach sym za druhim sportom pytał. Mój nan hladaše stajnje rady Snooker w telewiziji a to sym rady raz sobu hladał. Nimo toho mějachmy w horće małe billardowe blido, na kotrymž nimale wšědnje kule suwach. Njetraješe dołho a přizamknych so w Budyšinje towarstwje „Biga99“.
Za wjetšinu ludźi nima Snooker žadyn wuznam. Čehodla so Wy za to tak horiće?
M. Nuk: Jako młodostni hrajachmy w Budyskich lokalach husto billard. A jako so potom jendźelska warianta Snooker w telewizoru wusyłaše, je mje to někak hrabnyło. Hač do dźensnišeho to rady hladam a sym runja swojemu synej tež čłon Biga99.