Garlent hrajer dnja był
Łužiske lodohokejowe liški – Bayreuthske tigry 5:3 (2:1, 1:1, 2:1)
Duel mjez susodomaj w tabulce 2. lodohokejoweje ligi bě spočatnje wurunany. Móžnosće běchu na woběmaj bokomaj, preciznosć při třělwach pak hišće falowaše. Tajku pokaza skónčnje Frédérik Cabana. Wón měješe přewjele městna k dispoziciji a k 0:1 za Tigry přetwori. Dołho pak njetraješe, a Hunter Garlent wuwojowa sej puk a suny jón do syće. Hosćo njemějachu na to žanu wotmołwu. Za to zwyši Clarke Breitkreuz po přihrawce Petera Quennevilla w poslednjej sekundźe prěnjeje třećiny na 2:1.