ST 1922 Radwor – Zeleno-běli Sepicy 1:2 (0:1)

Za Radworske mustwo zasadźeni: Šěrak – B. Grubert (24. Dźisławk), M. Grubert, Wjesela, Bišof, Elsner (75. Schulze), Mička, Buša, Adam, Wencel (75. Franka), Glücklich

Na prěnju domjacu hru noweje sezony powitachu Radworscy koparjo mustwo ze Sepic. Po derbyju přećiwo Minakałej (2:2) chcychu sej hosćićeljo nětko před domjacej kulisu prěnje tři dypki sezony wudobyć. Kaž hižo w zazběhowej hrě startowaše domjacy cyłk derje. Hosćićeljo přewzachu spočatnje kontrolu a postajowachu hru w dalokej měrje. Z dobrym přihraćom a spěšnymi akcijemi předrěchu so Radworscy koparjo přeco zaso do bliskosće přećiwniskeje šěsnatki a wuhrachu sej prěnje móžnosće na wrota. Najwjetšu šansu spočatneje fazy wuhra sej Claudius Buša w 26. min. Po dobrej ofensiwnej akciji kopny wón bul na wrota, trjechi pak jenož łatu. Nawjedowanje bychu sej woni w tym času poprawom zasłužili.