SJ Njebjelčicy – ST Natwar Němske Pazlicy II 3:1 (2:0)

Zestawa SJ Njebjelčicy: Hahn – Hanuza, Hrjehor (77. T. Čornak), Korjeńk (64. Vega de Paz), Wjerš, R. Čornak, Plaettner (85. Herrmann), Krawčik, Rudolf, Statnik, Lehmann (62. Zarjeńk)

Po tym zo běchu derby w Radworju dobyli, witachu Njebjelčenjo druhe zastupnistwo z Němskich Pazlic.

Z jenož dwěmaj dypkomaj bě hóstne mustwo, kotrež bě tohorunja postupiło, kónčna swěca stafle dwaj wokrjesneje ligi. Hosćićeljo pak stejachu ze 14 dypkami na třećim městnje. Na spočatku hry njebě móžno jasnje zwěsćić, štó je faworit na dobyće. Čerwjene košle drje mějachu wjace hrajnych podźělow, z robustnym wašnjom hraća pak jim Němskopazličenjo ćežko činjachu. Z prěnimi wrotami hry nawjaza William Plaettner na swój „běh wrotow“ ze zašłych hrow. Po solu Statnika, kotryž sam kompletny škit hosći přewiny, móžeše Plaettner ze zdalenosće 25 metrow zakónčić a suny bul płonje do róžka wrotow k 1:0 (27.). Ze šćipku zboža mustwo trenarja Daniela Pohlinga krótko po tym nawjedowanje wutwari. Tež Jonas Krawčik so z distancy pospyta. Wotfalšowana třělwa lećeše wyše­ wrotarja a přizemi we wrotach k 2:0 (35.).