Drježdźany (SN/CoR). Pod hesłom „Minority report – Serbja a Huculojo ze swójskeho a cuzeho fotografiskeho wida“ su wčera w Drježdźanskej Galeriji Neue Osten wustajeńcu wotewrěli. Mjez druhim pokazuja tam tež wuzwolene wobrazy z projekta fotografa SN Maćija Bulanka wo serbskich drastynošerkach.
„Jako fotograf sym často we Łužicy po puću a dźiwam so, kak mało tule w Drježdźanach wo Serbach wědźa“, rjekny wčera kurator Matthias Schumann, „chcemy z wustajeńcu dohlady do wšědneho dnja słowjanskeju mjeńšinoweju kulturow podać, kotrejž stej drje 1 000 kilometrow wot so zdalenej, přiwšěm w tym zwjazanej, zo spytatej to swoje wobchować.“ Nimo toho dźe wo to, město wobrazow z wójny na Ukrainje normalne žiwjenje karpatskich wsow pokazać. „Na Ukrainje su wšelakore narody žiwe, kaž w susodstwje Huculow Łemkojo a Bojkojo, a kóžda je za cyły kraj wažna kaž hałzy za štom. Škoda, zo dźensa globalizacija małe kultury nabok storka. Ćim bóle so wjeselimy, zo móžemy pokazać, kak čiła naša wjesna kultura je“, potwjerdźi fotograf Dmytro Petryna.