Augsburg (dpa/SN). Zwjazkowy wobchadny minister Alexander Dobrindt (CSU) je komisiji EU prawo wotrjekł, wo planowanym němskim postupowanju nastupajo nadróžny popłatk za wosobowe awta rozsudźić. Nowinarjam Dobrindt rjekny, zo je planowane zniženje dawka za awta jenične naležnosć zwjazkoweje republiki. Wón pokaza na to, zo su staty EU w dawkowych prašenjach po zakonju samostatne. Komisija EU kritizuje, zo by zniženje dawka za awta jeničce za němskich šoferow płaćiło. To by druhim staćanam EU njelěpšiny wunjesło. EU chce přećiwo tomu postupować.

Drježdźany (dpa/SN). Sakski hospodarski minister Martin Dulig (SPD) je hišće raz potwjerdźił, zo dalše spušćadło Łobja njedaloko čěskeho Děčína wotpokazuje. Přiwšěm­ chcył wón wotpowědne čěske pruwowanje­ wobswětoznjesliwosće studować, kaž wón nowinarjam w Drježdźanach rjekny. Najebać to so Dulig negatiwnych wuskutkow na rěku w Sakskej kaž tež na přirodu a kulturnu krajinu boji. „W koaliciskim zrěčenju je napisane, zo Łobjo dale njewutwarimy.“ Z planowanym haćenskim schodźenkom chce Čěska rěku pohłubšić, zo móhli ju nakładne łódźe wužiwać. Na zetkanju sakskeho ministerskeho prezidenta Stanisława Tilicha (CDU) a čěskeho ministerskeho prezidenta Bohuslava Sobotki minjeny pjatk bě Tilich­ na přisłušnosć Čěskeje skedźbnił. Sakska chcyła we wobłuku pruwowanja znjesliwosće stejišćo zapodać. Zeleni žadaja sej mjeztym wot Tilicha „jasne słowo“ k wutwarej Łobja. Přehnate transportne prognozy a „sonjenja“ njeměli knježerstwo k wopačnym rozsudam pohnuć, rjekny jich frakciski šef Volkmar Zschocke.

Před policajskej stražu w bayerskim Coburgu­ je 22lětny za pruwowanje jězbneje šule zwučował. Po informacijach policije bě jemu 25lětny swoje awto w nocy na sobotu za to přewostajił. Zastojnikam napadny njewěste jězdźenje. Při kontroli woni zwěsćichu, zo bě muž bjez jězbneje dowolnosće po puću a zo mě­ješe 1,3 promile alkohola w kreji. Ze skóržbu­ ličić dyrbi 22lětny alkohola a jězdźenja bjez dowolnosće dla a 25lětny, dokelž­ bě jemu­ to zmóžnił.

Tola hišće přizjewił je so dobyćer 14 milionow eurow w loteriji. Jedna so wo 49lětneho přistajeneho z hornjeje Frankskeje, kaž loterijowa towaršnosć zdźěla. Muž bě dospołnje přemóženy, jako wo sumje dobyća zhoni. Wón prawidłownje loteriju hraje. Dokelž pak wužiwa wjacore tydźenje płaćiwe lisćiki, traje zwjetša trochu dlěje, prjedy hač ličby přirunuje.

Konkurenca přiběra

Lubnjow (dpa/SN/ch). Plahowarjo kórkow w Błótach čuja přiběracy ćišć konkurency z wukraja. Wjetše předźěłanske zawody su zdźěla hižo mjenje twory skazali, informujetej Agrarne drustwo Delnje Błóta a Błótowski dwór Niwica z wokrjesa Dubja-Błóta. Kraje, kaž na přikład Turkowska a Indiska, zamóža z wjele nišimi kóštami za mzdy kórki plahować. Pomjenowanje „błótowska kórka“ je drje wot EU škitane. Dźěl žnjow pak firmje pod tymle mjenom njepředawatej. W tym wobłuku dyrbja so plahowarjo kórkow potom tež z konkurencu we wukraju měrić­. Štwórtk žně kórkow w Błótach oficialnje zahaja.

Swětowy dźeń darowanja kreje