Namócnosće mjez Palestinjanami a israelskimi wojakami w Kraju ...
CDU chce nowozapočatk w Durinskej
Erfurt (dpa/SN). Po skandalu při wólbach durinskeho ministerskeho prezidenta chce CDU w Durinskej móžnosće parlamentariskeho nowozapočatka pruwować. Dyrbjało-li to zwrěšćić, su nowowólby njewobeńdźomne, kaž je předsydka CDU Annegret Kramp-Karrenbauer minjenu nóc po wjacehodźinskich wuradźowanjach w Erfurće zdźěliła. To rěka, zo chcyła wona durinskemu krajnemu předsydźe Mikej Mohringej zmóžnić, bjez nowowólbow a z nimi zwjazanych wočakowanych stratow za křesćanskich demokratow wuslědk wólbow ministerskeho prezidenta korigować. CDU bě srjedu zhromadnje z AfD politikarja FDP Thomasa Kemmericha do zastojnstwa ministerskeho prezidenta woliła, štož je wótre kritiki zbudźiło. Prezidij CDU bě sej hišće samsny dźeń nowowólby žadał. Kemmerich je wčera, dźeń po wuzwolenju, swój wotstup připowědźił. Do toho bě zwjazkowy předsyda FDP Christian Lindner do Erfurta přijěł a z nim rěčał.
Ludźo so noweho wirusa njeboja
Köln (dpa/SN). Najwjetši dźěl wobydlerjow Němskeje so corona-wirusa njeboji. Dźewjeć z dźesać woprašanych (89 procentow) so njestarosći, zo so sami abo jich swójbni z wirusom natyknu. To je wuslědk naprašowanja instituta infratest dimap w nadawku telewizijneho sćelaka ARD. Jenož kóždy dźesaty ma strach noweho wirusa dla za wulki (sydom procentow) abo jara wulki (tři procenty). Za naprašowanje su so minjenu póndźelu a wutoru cyłkownje 1 003 wólbokmanych w Němskej telefonisce prašeli.
Zwěsćili tež su, zo ludźo zamołwitym zarjadam a strowotniskim institucijam w Němskej hladajo na wirus dowěrjeja. Na wšě 82 procentow woprašanych je sej wěstych, zo maja zamołwići połoženje pod kontrolu. Jeno 14 procentow to hinak widźi a měni, zo tomu tak njeje.
Po cyłym Zwjazku zwěsćichu dotal 13 dopokazanych padow corona-wirusa, jědnaće z nich w zwisku z bayerskej firmu Webasto. Natyknjena žona z Chiny bě zawod wopytała a tak wirus němskim kolegam dale dała.
To a tamne (07.02.20)
Drogi w hódnoće cyłeho miliona eurow wučušlili su wosebje kubłane psy cłownikow na Frankfurtskim lětanišću. Wopojny jěd bě w jědźi za ćěšenki schowany. Prěni kurěr z Južneje Ameriki měješe dwanaće kilogramow w kófrje, tamny samo pjatnaće. Kokain bě we wjacorych tyzach schowany. Zastojnicy dźiwachu so hoberskeho mnóstwa dla. Telko drogow namakaja hewak jenož we wulkich „posyłkach“. Wobeju kurěrow su zajeli.
Z chorobnej sotru stać chcyła je so first lady Němskeje Elke Büdenbender jako młodostna. To je wona nowinarjam přeradźiła. Za přikład brała bě sej dźensniša mandźelska zwjazkoweho prezidenta Franka-Waltera Steinmeiera swój čas kmótru, kotraž w tym powołanju dźěłaše. Hižo zahe bě wona přeswědčena, zo tež holcy dobre wukubłanje trjebaja. Stała pak je so Büdenbender ze sudnicu.
Nowy Serbski superintendent
Drježdźany/Budyšin (SN). Hodźijski farar Christoph Rummel naslěduje Jana Malinka w zastojnstwje Serbskeho superintendenta. Ewangelsko-lutherska krajna cyrkej Sakskeje w Drježdźanach dowěri Christophej Rummelej nadawk, přewzać zastojnstwo wot 1. awgusta 2020. Takle je nowinski rěčnik cyrkwje Matthias Oelke wčera wotpowědne naprašowanje našeho wječornika wobkrućił.
Wosadni Jana Malinka we wobłuku dwurěčnych kemšow 19. julija w Budyskej Michałskej cyrkwi ze zastojnstwa rozžohnuja. Termin zapokazanja naslědnika hišće znaty njeje.
„Strach za demokratiju“
Washington (dpa/SN). Prezident USA Donald Trump je po słowach předsydki Domu reprezentantow, demokratki Nancy Pelosi, nadal „strach za demokratiju Ameriki“. Z wuwinowanjom Trumpa w jednanju wo jeho wotsadźenju su republikanscy senatorojo „bjezzakonskosć“ a podrywanje wustawoweho porjada normalizowali, Pelosi wčera wječor rozłoži. Hrozy dale strach, zo móhł Trump wólby manipulować. Jeho wuwinowanje žanu hódnotu nima, dokelž njeje senat za fairny proces trěbnych dalšich swědkow a dopokazy přizwolił, rjekny Pelosi.
Ličba schorjenjow jara přiběra
Peking/Yokohama (dpa/SN). Ličba dopokazanych infekcijow a mortwych noweho corona-wirusa dla w Chinje razantnje přiběra. Hač do srjedy postupi ličba pacientow z nowej chorosćow płucow w běhu jednoho dnja wo 3 887 na 24 324, kaž strowotniska komisija w Pekingu rozprawja. 490 ludźi je dotal zemrěło. Chinske wulkopósłanstwo w Berlinje zwěsća rozšěrjaceho so wirusa dla přiběrace njepřećelske zadźerženje přećiwo chinskim staćanam w Němskej.
UNO ma połoženje rozjimać
CDU po wólbach w Erfurćewe wuskosćach
Erfurt/Berlin (dpa/SN). Durinska CDU steji po wuzwolenju noweho ministerskeho prezidenta z pomocu AfD masiwnje pod ćišćom. Zwjazkowa předsydka CDU Annegret Kramp-Karrenbauer hrožeše swojim stronskim přećelam w Erfurće z konsekwencami, dyrbjeli-li woni z nowym knježerstwowym šefom Thomasom Kemmerichom (FDP) hromadźe dźěłać. „Tutón ministerski prezident nima žanu parlamentarisku wjetšinu a dyrbi so stajnje na AfD zepěrać“, rjekny wona w telewiziji ZDF. Tuž by kóždežkuli zhromadne dźěło z Kemmerichom ranjenje stronskeje linije było, kotraž kooperaciju z AfD raznje wuzamkuje, „z wotpowědnymi sćěhami“. Kramp-Karrenbauer žada sej nowowólby w Durinskej.
Razne naprawy wotpadkow dla
Wobswětoškitne zwjazki přećiwo dalšemu zanjerodźenju wobswěta
Berlin (dpa/SN). Wobswětoškitne zwjazki žadaja sej drastiske naprawy, zo by so dalšim plastowym wotpadkam zadźěwało. Z pomocu raznych wobmjezowanjow a zakazow dyrbjała so produkcija kumštnych maćiznow a jich přetrjeba masiwnje redukować, zdźělichu wobswětoškitne organizacije kaž BUND, Greenpeace a Němska wobswětowa pomoc wčera w Berlinje. Wo wobłuku kataloga žadanjow na zwjazkowe knježerstwo namjetuja mjenowane organizacije mjez druhim wotedawk na wobswětej wosebje škodźace jónkrótnje wužiwajomne wudźěłki kaž plastowe tity, jónu wužiwajomne napojowe bleše a kofejowe nopaški za sobuwzaće. Popłatk na tajke wudźěłki dyrbjał znajmjeńša 20 centow wučinjeć.
Serbska pěseń w nowym běrowje
To a tamne (06.02.20)
Wobličo Friedricha Engelsa, sobuawtora Komunistiskeho manifesta, pyši wotnětka dźesać wotpadkowych awtow Wuppertalskich měšćanskich zawodow. Město chce Engelsa tak k 200. narodninam počesćić. Wón bě Wuppertal hižo jako młody muž wopušćił. Zhromadnje z Karlom Marxom sta so z wodźacym teoretikarjom socializma. Wuppertal planuje lětsa za swojeho wuznamneho syna wjace hač sto zarjadowanjow.
Wosebje chrobłeho wobšudnistwa dla steja wjacori mužojo w Francoskej před sudnistwom. Wobskorženym wumjetuja, zo su so před pjeć lětami jako francoski zakitowanski minister Jean-Yves Le Drian wudawali a sej z wopačnymi přilubjenjemi pola předewzaćelow a druhich miliony eurow spakosćili. Za to běchu formulary ministerstwa falšowali a samo masku z mjezwočom ministra wužiwali.
