Policija (09.07.20)

štwórtk, 09. julija 2020 spisane wot:

Woheń škodu načinił

Ptačecy. Woheń na Kóšynskej dróze w Ptačecach (Tätzschwitz) su wčera wohnjowe wobory z Wojerec, Čorneho Chołmca, Ptačec, Łutow a Kóšyna (Großkoschen) a pomocnicy ze Złeho Komorowa hašeć dyrbjeli. Po prěnim přepytowanju zajachu policisća podhladneho 30lětneho muža. Pomhał je zastojnikam při tym po­licajski pos ze Zhorjelca. Płomjenja su bróžnju a třěchu pódlanskeho domskeho wobškodźili. Wěcna škoda wučinja 60 000 eurow. Zranił so na zbožo nichtó njeje.

Policija (08.07.20)

srjeda, 08. julija 2020 spisane wot:

Konop plahowali

Budyšin. Podhlada ilegalneho plahowanja konopje dla podachu so policisća póndźelu wječor do bydlenja dweju 26lětneju muži w Budyšinje. Tam wuhladachu na balkonje dwě konopjowej rostlinje, w bydlenju hišće wjacore diwersne utensilije, někotre titki z njejasnym wobsahom a rozbuchadło.

Polo so paliło

Ćisk. 13 wohnjowych wobornikow je na polu njedaloko Ćiska woheń zhašało. Palił njebě so lěs, kaž běchu wobydlerjow informowali, ale dohromady 250 kwadratnych metrow wotžnjateho pola.

Policija (07.07.20)

wutora, 07. julija 2020 spisane wot:

Ze zapřahom znjezbožił

Kulow. Kaž Zhorjelska policajska direkcija zdźěli, je njedźelu popołdnju napoł třoch na Nowowjesnjanskim puću w Kulowje konjacy zapřah znjezbožił. Z dotal njeznateje přičiny běštej do kuče zapřehnjenej konjej na lěwy bok puća twochnyłoj, kuču sobu torhnyłoj a dale na bliske pola běžałoj. Za pohonča měješe wulět bolostny wukónc. Wón padny do hrjebje a so zrani. Škoda na kremseru wučinja něhdźe tysac eurow. Konjomaj so na zbožo ničo stało njeje.

Policija (06.07.20)

póndźela, 06. julija 2020 spisane wot:

Woheń deski dla wudyrił

Wojerecy. Tołste mróčele pokazowachu sobotu popołdnju na to, zo so w bydlenju na Wojerowskej Salomona Bohuchwała Frencelowej pali. Na městnje zwěsćichu wohnjowi wobornicy, zo ležeše drjewjana deska na kachlach, kotrež bě po zdaću njewotpohladnje zaswěćiło. Na zbožo so nichtó njezrani. Na hašenju wobdźělene běchu wobory Wojerecy-stare město, Němcy, Wojerecy-nowe město/Kinajcht a Ćisk kaž tež wuchowanska słužba maltezow. Dohromady 36 kameradow bě zasadźenych.

Třěcha bróžnje so paliła

Ptačecy. Hižo w nocy na sobotu w jednej dyrbješe wohnjowa wobora palacu třěchu bróžnje w Ptačecach hašeć. W bróžni běchu dźěłowe graty za pólne dźěła składowane. Na zbožo njejsu płomjenja na pódlanske domy přeskočili. Přiwšěm bě wulkeje horcoty dla k wobškodźenju pódlanskeho kónctydźenskeho domskeho dóšło. Wěcnu škodu trochuja na wjacore tysacy eurow. Fachowcy nětko přičiny wohenja přepytuja.

Policija (03.07.20)

pjatk, 03. julija 2020 spisane wot:

Mortwy w Čornym Halštrowje

Wojerecy. We Wojerecach je pasant srjedu wječor w Čornym Halštrowje při Alberta Einsteinowej mortwu wosobu wuhladał. Zawołani zastojnicy wuchowanskeje słužby, wohnjoweje wobory a policije ju z wody wućahnychu. Jedna so wo 36lětneho. Pod kotrymi wobstejnosćemi je wón žiwjenje přisadźił, dotal nichtó njewě. Přikazali su tuž obdukciju ćěła.

Twochnjena zaso doma

Gersdorf. 13lětna holca, kotruž su srjedu we wjesnym dźělu Haselbachtala Gersdorfje pytali, je zaso doma. Kameradojo wohnjoweje wobory běchu twochnjenu holcu hišće samsny wječor w lěsu blisko Gersdorfa nadešli.

Paducha lepili

Kamjenc. Předawarki kupnicy na Sydlišćowym puću w Kamjencu so předwčerawšim rano njemało dźiwachu, zo bě so hižo do wotewrjenja předawanišća paduch do njeho dóstał a kak blešu z napojom do zaka tyka. Kaž zawołana policija zwěsći, bě 31lětny wopojeny w kupnicy hižo wospjet kradnył.

Policija (02.07.20)

štwórtk, 02. julija 2020 spisane wot:

Dom za drogami přepytali

Biskopicy. Policija je dźensa rano znowa bydlenje w Biskopicach přepytała, hdźež bě hakle w meji drogi našła. Dźensa rozhladowachu so zastojnicy tež na hornjej łubi a w pincy domu a zawěsćichu wjacore sudobja. Pohladneho woby­dlerja su na policajski rewěr sobu wzali.

Policija (01.07.20)

srjeda, 01. julija 2020 spisane wot:

Spar jemu zahuba był

Wojerecy. Chětro mučny drje dyrbješe paduch być, kiž bě so w nocy na póndźelu w Ćisku do bydlenskeho mobila, kólnje a twarskeho woza zadobył. Wšako njeje daloko přišoł a je sej na susodnej zahrodźe na stólcu wusnył. Wobydler tam spjaceho nańdźe a zawoła policiju. Jej znaty 22lětny pakostnik spyta hišće ćeknyć, ale bjez šansy. Tež rubiznu w hódnoće něhdźe tysac eurow zastojnicy za wottransport spřihotowanu namakachu. Nimo płonowobrazoweho telewizora běchu to mjez druhim DVD-player, kašćik ­piwa a powětrowa klumpa za koleso.

Policija (30.06.20)

wutora, 30. junija 2020 spisane wot:

Awto pod balkonom zatłusnjene

Kamjenc. Nuzowi pomocnicy a wohnjowi wobornicy dyrbjachu wčera wječor napoł sedmich na Njebjelčanskej dróze mjez Kamjencom a Brěznju pomhać. Tam bě Nissan do sćěny chěže zrazył. Awto wosta pod balkonom wisajo, při čimž so jeho šofer zatłusny. Wohnjowi wobornicy jeho ćežko zranjeneho wuswobodźichu a do chorownje dowjezechu. Policija přičiny njezboža přepytuje.

Transporter so palił

Biskopicy. Minjenu nóc krótko do dwěmaj paleše so na hasy Zum Wiesengrund w Biskopicach transporter. Dwanaće dobrowólnych wohnjowych wobornikow je woheń na to zhašało.

Policija (29.06.20)

póndźela, 29. junija 2020 spisane wot:

Woheń na zbožo žadyn njebył

Pančicy-Kukow. Krótko do połnocy na njedźelu wołachu wohnjowu woboru a policiju do klóštra Marijineje hwězdy w Pančicach-Kukowje. Na zbožo pak so wukopa, zo so tam ničo njepali. Płomjenja we wohnjowej škli na ležownosći napřećo dźěłarni běchu so w škleńčanych durjach špihelowali.

Policija (26.06.20)

pjatk, 26. junija 2020 spisane wot:

Paducha lepił

Kamjenc. Sobudźěłaćer Kamjenskeho nakupowanišća je předwčerawšim paducha lepił. Podhladny bě bjez toboły do wobchoda šoł a jón bórze na to z tobołu a tołstym nachribjetnikom wopušćił. Jako jeho sobudźěłaćer narěča, poča tamny agresiwny być a jeho snadnje zrani. Paduch wostaji rubiznu stejo a z kolesom ćekny. Daloko přišoł pak njeje, přetož alarmowana policija jeho bórze dosahny. Rubiznu – drastu a kapsnu lampu w hódnoće 400 eurow – móžachu kupnicy wróćić.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND