Kubłanski system w Sakskej a Braniborskej nuznje přepruwować

Budyšin (SN/JaW). Zhromadny list na­wodow serbskich institucijow a zarjada Domowiny braniborskej ministerce za kubłanje, młodźinu a sport Briće Ernst (SPD) a sakskemu ministrej za kultus Christianej Piwarzej (CDU) je chětro horce­ diskusije zbudźił, a to nic jenož w serbskej zjawnosći.

W spisu pod nadpismom „Naša rěč trjeba přichod“, kotryž našej redakciji předleži, kritizuja nawodźa – podpisali su dwanaće nawodnych zastupnikow wšitkich serbskich institucijow a zastupnikaj zarjada Domowiny z Hornjeje a Delnjeje Łužicy – hłownje rěčny staw wotchadnikow serbskich kubłanišćow. Docpěć chcedźa, zo politiscy zamołwići w Braniborskej kaž Sakskej reaguja a šulske kubłanje na dobro wobeju serbšćinow polěpša. Tohodla žadaja sej ku­błanski system we woběmaj krajomaj „nuznje přepruwować“. Wšako zwěsćeja „w minjenych lětach, zo ličba tych, kotřiž hornjo- a/abo delnjoserbšćinu na wysokim niwowje wobknježa, widźomnje a jasnje woteběra“.