Berlin/Drježdźany (dpa/SN). Po wšej Němskej su dźensa kónc Druheje swětoweje wójny a wuwobodźenje wot nacionalsocializma před 75 lětami wopominali. W nocy wot 8. na 9. meju 1945 bě fašistiska Němska w Berlinje bjez wuměnjenjow kapitulowała. Wójna bě sej hač do 60 milionow woporow žadała.

W Berlinje staj zwjazkowa kanclerka Angela Merkel (CDU) a zwjazkowy prezident Frank-Walter Steinmeier při Nowej straži – centralnym wopomnišću za wopory wójny a namócneho knjejstwa – wěnc połožiłoj. Na zarjadowanju wobdźělichu so tež prezidenća Němskeho zwjazkoweho sejma, Zwjazkoweje rady a Zwjazkoweho wustawoweho sudnistwa Wolfgang Schäuble (CDU), Dietmar Woidke (SPD) a Andreas Voßkuhle. Planowany statny akt před Reichstagom z 1 600 hosćimi dyrbjachu koronakrizy dla wotprajić. Tajki statny akt bě so dotal hakle jónu wotměł, 1995 z tehdyšim zwjazkowym prezidentom Romanom Herzogom.