Tójšto listow ležo wostawa
Choćebuz (dpa/SN). Njewobmjezowany stawk přistajenych Němskeho pósta so tež na juhu Braniborskeje wuskutkuje. Tež w Choćebuskim centrumje za rozdźělowanje listow su dźěło złožili. Po informacijach dźěłarnistwa ver.di po wšej Braniborskej wšědnje něhdźe 3,5 milionow listow a pakćikow ležo wostawa. Minjene dny je so póstej poradźiło, z pomocu wupomocow a zastojnikow negatiwne wuskutki stawka wobmjezować. W tarifowym rozestajenju dźe wo dźěłowe wuměnjenja za 140 000 přistajenych. Předewšěm pak wadźa so špatnišich mzdow w 49 nowozałoženych regionalnych towaršnosćach za rozdźělenje pakćikow dla. Tam přistajenych 6 000 ludźi njepłaća po tarifach pósta, ale po nišich tarifach.
Sobudźěłaćerjo protestowali
Elmau (dpa/SN/K). Z připrajenjom, wuhla so poněčim wzdać, su staty G 7 dali signal přećiwo woćoplenju zemje. Poł lěta do Pariskeho wjerška UNO wo klimje postajichu statni a knježerstwowi šefojo sydom najwažnišich industrijnych krajow swěta za zaměr, „w běhu tohole lětstotka“ zmóžnić swětowe hospodarstwo bjez wužiwanja fosilnych energijow. Zwjazkowa kanclerka Angela Merkel (CDU) je so jako hosćićelka wjerška z wobzamknjenjemi wo klimje přećiwo wobmyslenjam Japanskeje a Kanady přesadźiła. Wona bě sej jasny signal G 7 žadała, hewak móhł wjeršk UNO zwrěšćić.
Berlin (B/SN). W němskej zwjazkowej CDU konstituowana dźěłowa skupina „přesćěhanje křesćanow“ je dźěl fachoweho wuběrka za wonkownu, wěstotnu a wuwićowu politiku kaž tež za čłowjeske prawa strony. Gremijej z 25 ludźimi přisłušeja zastupjerjo zwjazkoweje a krajneje CDU a eksperća na polu diskriminacije. Wón ma informować wo situaciji wohroženych a přesćěhanych křesćanow.
Partnerske cyrkwje wopytali
Hannover (B/SN). Delegacija rady Ewangelskeje cyrkwje w Němskej je so w Brazilskej a Argentinskej wo partnerskich cyrkwjach informowała. Fenomen rosćaceje sekularizacije na swěće dožiwjeja tež cyrkwje Južneje Ameriki, rjekny ewangelska biskopka za wukraj Petra Bosse-Huber w Hannoveru. Delegaciju nawjedowaše sakski biskop Jochen Bohl.
Znamjo ekumeny