Indiscy ratarjo po puću do stolicy
New Delhi (dpa/SN). W Indiskej je so konflikt mjez protestowacymi ratarjemi a wěstotnymi mocami dale přiwótřił. Dźesaćitysacy burow su wčera na wuslědk dalšeje rozmołwy mjez nawodnikami demonstrantow a indiskim knježerstwom čakali. Burja žadaja sej garantowane płaćizny za swoje wudźěłki a wjace pjenježneje podpěry.
Ratarjo čakachu po informacijach medijow při barikadach betonowych blokow, železnych elementow a druhich wěcow, z kotrymiž běchu woni dróhi do směra na indisku stolicu New Delhi zaraćili. Ratarjo mějachu bagry, měchi pěska, rukajcy a nahubniki sobu. Wěstotne mocy běchu z elektriskimi šokowymi nastrojemi, sylzopłunom a maskami wuhotowane. Pječa su z trutami sylzopłun na demonstrantow mjetali. Protestowy pochod na New Delhi běchu ratarjo hižo minjeny tydźeń zahajili. Policisća běchu jón stajnje zaso ze sylzopłunom zadźerželi. Po wjacorych njewuspěšnych rozmołwach ze zastupnikami knježerstwa běchu ratarjo rozsudźili, zo z maršom do stolicy pokročuja. Protest wotměje so něšto měsacow do wólbow parlamenta.
To a tamne (22.02.24)
Priwatny stawk šofera nakładneho awta na parkowanišću je zasadźenje policije zawinował. Předewzaćel wozydłownistwa bě policiju wo pjanym šoferu na parkowanišću w Ottendorfje-Okrilli informował. Zastojnicy nadeńdźechu woprawdźe 52lětneho pólskeho šofera, kiž měješe wjace hač dwě promile alkohola. Jěć pak wón nochcyše, dokelž swojeho šefa dla stawkowaše, kaž sam rjekny.
Sta litrow piwa na dróze a hromady črjopow: Nakładne awto je wčera po puću na awtodróhu 70 w hornjofrankskim Kulmbachskim wokrjesu sta piwowych kašćikow zhubiło. Rumowanje traješe po informacijach policije wjacore hodźiny. Palety piwa běchu so w křiwicy suwać započeli, přełamachu wobhrodźenje připowěšaka a padnychu na dróhu. Kontrola wunjese, zo njebě piwo porjadne přiwjazane. Škoda wučinja 35 000 eurow.
Dźeń maćeršćiny
Budyšin/Drježdźany (SN/MiP). Składnostnje dźensnišeho Mjezynarodneho dnja maćeršćiny je Cordula Ratajczakowa projekt za rewitalizaciju serbšćiny - ZARI, w kotrymž jako wědomostna wjednica dźěła, w Sakskich nowinach (SZ) předstajiła. Nimo wažneho dźěła rěčnych motiwatorow je tež na wědomostne dźěło w projekće a z toho wuchadźace dopóznaća skedźbniła. Dźěło na „rěčnych biografijach“ wukristalizuje na přikład přičiny za wšelakore nastajenje ludźi k serbšćinje w dwurěčnych kónčinach. „Z wulkej wěstosću móžemy prajić, zo ma kóždy Łužičan znajmjeńša jednoho w swojej swójbje, kotryž je serbsce rěčał“, praji Ratajčakowa. Projekt ZARI widźi w tutym fakće šansu, rěč dźěda abo wowki mjez ludźimi zaso wožiwić.
Baerbock namołwja Putina
Rio de Janeiro (dpa/SN). Wonkowna ministerka Annalena Baerbock (Zeleni) je do zetkanja wodźacych a wuwiwacych so industrijnych krajow swěta G20 na zamołwitosć ruskeho prezidenta Wladimira Putina za daloko sahace sćěhi nadpadniskeje wójny přećiwo Ukrainje dopominała. „Hdyž sej Putin mysli, zo je swět po dwěmaj lětomaj zabył, štó je za wójnu a jeje sćěhi zamołwity, potom je so mylił“, rjekny Baerbock do wotlěta do Brazilskeje. Wójna traje mjeztym dwě lěće.
Dalše słyšenje Assangea dla
London (dpa/SN). Rozsudne słyšenje w juristiskim rozestajenju w Londonje wo přepodaće Juliana Assangea justicy USA traješe dźensa druhi dźeń. Po tym zo su wčera prawiznicy załožerja platformy Wikileaks swoje argumenty přednjesli, ličachu dźensa z přednoškom přećiwniskeje strony. Hdy sudnistwo rozsudźi, njeje znate. W USA chcedźa Assangea spionaže dla k jastwu 175 lět zasudźić, dokelž je wójnske złóstnistwa wotkrył.
Wuradźuja wo cannabisu
W israelskej stolicy Tel Avivje su so wčera wječor znowa přiwuzni ...
Rozšěrjenje Tesle wotpokazali
Schwesigza dojednanje
Wagenknecht warnuje před wójnu
Berlin (dpa/SN). Załožerka swójskeje strony Sahra Wagenknecht warnuje před strachom wójny za Němsku, dyrbjało-li zwjazkowe knježerstwo Ukrainje daloko sahace brónje přewostajić. Zapósłanča zwjazkoweho sejma je so wčera z raznymi słowami přećiwo planowanej próstwje frakcijow amploweje koalicije SPD, Zelenych a FDP wobroćiła. Frakcije zwjazkowe knježerstwo namołwjeja, Ukrainu z tajkimi brónjemi podpěrować, zo móhła wona zaměrnje strategisce wažne objekty daloko za ruskej frontu nadběhować. „Tuta wot wójny pjana próstwa je nowy schodźenk eskalacije a woprawdźity strach za naš kraj“, Wagenknecht rjekny. Amplowa frakcija SPD, Zelenych a FDP chce wójnu do Ruskeje njesć. „To njepřinjese Ukrainje žadyn měr, ale ćehnje Němsku do wójny.“ Wagenknecht zasadźuje so za přiměr a hnydomne chutne jednanja wo měr.
Politikarka FDP Agnes Strack-Zimmermann bě sej žadała, z němskimi raketami Taurus rusku stolicu Moskwu nadběhować. Roderich Kiesewetter (CDU) w njedawnej rozmołwje z nowinarjemi namjetowaše, „wójnu do Ruskeje njesć“.
