Berlin (dpa/SN). Zwjazkowe knježerstwo je swoju próstwu na cyrkwje, so jutrownych prezencnych Božich słužbow wzdać, cofnyło. Zwjazkowy nowinarski zarjad je wčera nowu wersiju wobzamknjenjow Zwjazka a zwjazkowych krajow rozesłał, w kotrymž kompletny wotrězk k dotal planowanemu „jutrownemu měrej“ pobrachuje. Tak wotpadnje tež dotalna sada: „Zwjazk a kraje proša nabožne zjednoćenstwa, zhromadźowanja jenož hišće wirtuelnje přewjesć.“
Namołwa, so prezencnych Božich słužbow wzdać, bě w katolskej kaž tež ewangelskej cyrkwi zadźiwanje a njezrozumjenje zbudźiła. Zwjazkowy nutřkowny minister Horst Seehofer (CSU) bě próstwu kritizował. Wón bě so dźiwał, zo runje strona z „C“ w swojim mjenje tajke žadanje staja.
Berlin (dpa/SN). Po lěta trajacej diskusiji je zwjazkowy sejm wobzamknył lobbyjowy register zawjesć. Zakoń, kiž su wčera wječor schwalili, zawjazuje profesionalnych zastupjerjow zajimow, do zjawnje přistupneho registra so zapisać a podać, za koho dźěłaja. Tak chcedźa přichodnje jasnišo dokumentować, štó je politiske rozsudy a zakonjedawstwo wobwliwował. Zapósłanc CDU Patrick Schneider rjekny, zo njeje zastupnistwo zajimow zasadnje špatne, zo pak měło transparentnje dokumentowane być. Štóž prawidła njedodźerži, dyrbi hač do 50 000 eurow pokuty płaćić. Register ma digitalnje předležeć.
Opozicija nima wot wulkeje koalicije wujednane prawidła za dosahace. Tež organizacija Transparency International widźi wulke njedostatki. „Njezmějemy tež dale žanu transparencu wo konkretnym lobbyjowym dźěle abo jenož jara snadnu“, praji šef němskeje wotnožki organizacije Hartmut Bäumer.
Falšowany pokal champions league su cłownicy w pakeće z Chiny našli. Pokal skazał bě 30lětny Mnichowčan. Wón bě sudobjo w chinskim internetnym portalu namakał a za 400 eurow skazał. Při tym njebě jemu wědome, zo je zakazane falšowanki do Němskeje dowožować. Prawa na originalnym pokalu w hódnoće 50 000 eurow ma koparski zwjazk UEFA. Cłownicy su wopačny pokal sćazali.
Tři z hnězda padnjene wjewjerčki su w Augsburgu wohnjowych wobornikow zaběrali. Jako spytachu je pomocnicy do hnězda wróćo wabić, sej młodźatka radšo z nimi hrajkachu. Wone so njebojachu, wšako čłowjekow jeno z wysokosće znajachu – a zajimawych wobornikow scyła nic. Dokelž pak bychu na zemi wot psow a kóčkow wohrožene byli, je wobornicy po rěblu na hałzu štoma sadźichu. Wottam so wjewjerčki do hnězda zminychu.
Berlin (dpa/SN). Zwjazkowa kanclerka Angela Merkel (CDU) je trěbnosć swójskeje produkcije seruma přećiwo koronawirusej w Europskej uniji potwjerdźiła. We Wulkej Britaniskej produkuja za Wulku Britanisku, USA žane šćěpiwo do wukraja njesćelu, kanclerka dźensa w zwjazkowym sejmje rjekny. „Europa je tuž dołhodobnje na to pokazana, štož EU produkuje.“ Angela Merkel nimo toho namołwješe, „cyły swět ze serumom zastarać. Hewak budźemy zas a zaso z nowymi formami koronawirusa konfrontowani.“
Söder za hinaše konferency
Berlin (dpa/SN). Bayerski ministerski prezident Markus Söder (CSU) je so za změny dotalneho formata konferency Zwjazka a zwjazkowych krajow wuprajił. Konferenca dyrbjała spěšnišo, efektiwnišo a zjawnišo dźěłać. Wšako interne informacije z konferency hižo nětko spěšnje zjawnosć docpěwaja. Posedźenja měli so hižo rano započeć, a dyrbjeli je tež raz přetorhnyć, njeje-li wuspěch spóznajomny. Nócne posedźenja njejsu spomóžne.
Posaarska skónči lockdown
Drježdźany (dpa/SN). Sakski krajny sejm je so dźensa znowa z koronakrizu zaběrał. W aktualnej hodźinje debatowaše parlament wo połoženju žonow w časach korony. Wjacori rěčnicy wuzběhnychu wosebite poćežowanje předewšěm maćerjow, kotrež maja najwjetše brěmjo njesć, hdyž dyrbja na přikład jich dźěći zawrjenych šulow dla doma wostać.
Hižo wčera bě koronapandemija w plenumje Drježdźanskeho sejma wusahowaca tema wuradźowanjow była. W nadawku knježerstwa informowaštej ministerka za strowotnistwo Petra Köpping (SPD) a ministerka za kulturu a turizm Barbara Klepsch (CDU) wo tuchwilnej situaciji. Petra Köpping bě sej wěsta, zo su čuwy ludźi mjeztym hranicy napjatosće docpěli. Mnozy měnja, zo wobmjezowanja hižo dlěje njeznjesu.