Frankfurt n. W. (dpa/SN). Natwar no­weho kruteho škitneho płota mjez Němskej a Pólskej k wotwobaranju afriskeje swinjaceje mrětwy je w Braniborskej zapławjenjow dla haćeny. Płót je 185 kilometrow daloko dotwarjeny a ma na kóncu 249 kilometrow dołhi być, rjekny ministerka za škit přetrjebarjow Ursula Nonnemacher (Zeleni) we wuběrku za škit přetrjebarjow. Bědźimy pak so hišće z płoninami, na kotrychž leži stara municija, Nonnemacher rjekny. Tež zapławjene ležownosće su dale wulki problem. Na włóžnych nasypach njemóžemy płoty nastajić, dokelž sćežory njedźerža, ministerka rjekny. Swinjaca mrětwa njeje za čłowjeka strašna, za dźiwje a domjace swinje pak smjertna. Šćěpjenje přećiwo mrětwje njeje móžne. Prěni pad chorosće mjez dźiwimi swinjemi běchu 10. septembra 2020 w Braniborskej oficialnje wobkrućili. Pozdźišo bu znate, zo běchu hižo spočatk julija prěnje natyknjene zwěrjata na mrětwu zahinyli. Přičina mrětwy móhła być, zo su so zwěrjata ze zapadneje Pólskeje do Němskeje předrěli abo zo su zbytki žiwidłow abo swinjaceho mjasa na parkowanišćach žrali.

Čisty paduch: W Sewjerorynsko-Westfalskej je so muž do bydlenja zadobył, zo by dušował. Jako wobydlerka ze swojej dwulětnej dźowku domoj přińdźe, słyšeše wona zwuki z kupjele a steješe před zamknjenymi durjemi. Z pjenjezom móžeše wona durje wotamknyć a wuhlada muža w trochowanej starobje mjez 30 a 40 lětami z trěnjom w ruce. Wón žonje rozłoži, zo chcyše jenož dušować. Žona z bydlenja ćekny a zawoła policiju. Prjedy hač zastojnicy přijědźechu, bě muž preč.

Swinje móža kompjuterowe hry hrać. Tole su wědomostnicy uniwersity Purdure w zwjazkowym staće Indiana w USA zwěsćili. Woni su swinje na to trenowali, z klamu joystick tak posłužować, zo so cursor na wobrazowce na wěste městno pohibuje. Jako myto dawaše chłóšćenku. Fachowcam je to dopokaz, zo su swinje inteligentniše hač dotal myslene.

Washington (dpa/SN). Prawiznicy demokratow w jednanju k wotsadźenju Donalda Trumpa maja bywšeho prezidenta za hłowneho zamołwiteho namócneho nadpada na Kapitol. „Donald Trump je ćežke złóstnistwo přećiwo našej wustawje a našemu ludej skućił“, rjekny najwyši zastupnik demokratow, Jamie Raskin wčera při procesu w Senaće. „Trump njebě přihladowar, wón je namóc naškarał.“ Přiwisnicy Trumpa běchu 6. januara po jeho narěči Kapitol wobsadźili.

Söder: Mjezy wirusa dla zawrěć

Berlin (dpa/SN). Bayerski ministerski prezident Markus Söder (CSU) w boju přećiwo rozšěrjenju koronawirusa za­wrjenje mjezy k Čěskej hižo njewuzamkuje. „Njedyrbjała-li Čěska kmana być, swoje nuzowe naprawy podlěšić, dyrbjało jasne być, zo je Čěska mutaciska kónčina a zo je zawrjenje mjezy potom tema, wo kotrejž dyrbimy rěčeć“, rjekny Söder wčera w sćelaku ZDF. To samsne płaći za Awstrisku, hdźež su južnoafrisku wariantu koronawirusa zwěsćili.

Poćahi dale sprostnjene

Priwatna wobydlerska iniciatiwa je wčera w jednym z Hamburgskich měšćanskich parkow stany za bjezdomnych nastajiła, ­kotřiž tuchwilneho lódzymneho wjedra dla najbóle ćerpja. Iniciatiwa bě stany, přikrywy, matracy a isomaty mjez ludźimi ­zběrała, zo bychu ludźo bjez bydlenja znajmjeńša trochu škitani byli. Foto: dpa