Žaruja wo morjenu 16lětnu holcu

póndźela, 03. awgusta 2015 spisane wot:
Tel Aviv (dpa/SN). W Israelu wopominachu dźensa 16lětnu młodostnu, kotraž bě po nadpadźe z nožom na paradu homoseksualnych w Jerusalemje zemrěła. We wjacorych městach zhromadźichu so žarowacy ze swěčkami. Ultraortodoksny Žid bě při paradźe minjeny štwórtk z nožom do wobdźělnikow kłół a šěsć wosobow zranił, mjez nimi 16lětnu. Holca bě wčera na sćěhi swojich ćežkich zranjenjow­ wudychała. Ministerski prezident Benjamin Netanjahu je swójbje wopora swoje sobužarowanje wuprajił, připo­wědźejo konsekwentne postupowanje přećiwo kóždemužkuli ekstremi­zmej. Minjeny pjatk běchu radikalni sy­dlerjo dom palestinskeje swójby zapalili. 18 měsacow­ stare dźěćo při tym zahiny.

Nowe nadpady

póndźela, 03. awgusta 2015 spisane wot:
Istanbul (dpa/SN). Dobry tydźeń po spočatku nalětow turkowskeje armeje na zepěranišća zakazaneje kurdiskeje dźěłaćerskeje strony PKK je dźeń a wjace nadpadow na turkowske wěstotne mocy. Při atentaće we wuchodoturkowskej pro­wincy Agri buštaj wčera po informacijach armeje policistaj morjenaj. 31 dalši so zranichu. Wójsko dawa PKK winu. Nadpadnicy běchu z traktorom do zepěranišća žandarmerije jěli a tam připowěšak rozbuchnyli, na kotrymž běštej dwě tonje rozbuchliny. We wuchodoturkowskej prowincy Mardin zahiny wojak, jako zajědźe ze swojim jězdźidłom na minu, kotruž­ běchu tam prawdźepodobnje wojowarjo PKK schowali.

Proces zahajeny

póndźela, 03. awgusta 2015 spisane wot:
Celle (dpa/SN). Pod raznymi wěstotnymi naprawami zahaji so dźensa na Wyšim krajnym sudnistwje w Celle proces pře­ćiwo wojowarjomaj teroristiskeje milicy Islamski stat (IS), kotrajž staj so do Němskeje wróćiłoj. Z Wolfsburga pochadźacaj mužej běštaj w meji 2014 přez Turkowsku do Syriskeje šłoj a so tam IS přizamknyłoj. Ayoub B. (27) je aktiwnje wojował, Ebrahim H. B. (26) je pječa sebjemordarski atentat w Bagdadźe planował. Wobkedźbowarjo lubja sej w procesu nowe dopó­znaća wo strukturach IS.

To a tamne (03.08.15)

póndźela, 03. awgusta 2015 spisane wot:

Hoberska technoparty je wobydlerjow małeje čěskeje wsy překwapiła. Zamoł­wići běchu priwatny swjedźeń z něšto stami hosći wočakowali. Město toho přijědźe po informacijach policije 4 000 ludźi ze wšeje Europy do małeje wsy Červený Újezd pola Teplic z runje 80 wobydlerjemi. Wobydlerjo nócnu hudźbu sćerpnje znjesechu. Policija party wobkedźbo­- waše, njemóžeše pak ničo chłostajomneho zwěsćić, kaž rěkaše.

Wosy dla je žona ze swojim motorskim čołmom na rěče Fulda pola Kassela znjezbožiła. Po informacijach policije bě so 52lětna sobotu insekta tak nastróžiła, zo stłóči płunowu ručicu. Šěsć metrow dołhi čołm na to raznje pospěši. Z wulkej spěšnosću a bjez kontrole wón z wody wujědźe a na kolesowanskej šćežce stejo wosta. Nichtó so njezrani. Škoda wučinja přiwšěm 3 000 eurow.

Łužica (03.08.15)

póndźela, 03. awgusta 2015 spisane wot:

Pjenjezy za dźěło we wopomnišću

Choćebuz (dpa/SN/ch). Za dźěło we wopomnišću w bywšim jastwje NDR ma Choćebuski centrum za čłowjeske prawa lětsa a klětu cyłkownje 183 000 eurow dóstać. Braniborski kulturny statny sekretar Martin Gorholt je centrumej dźensa popołdnju wotpowědnu spěchowansku zdźělenku za dźěło we wopomnišću přepodał. Choćebuske bywše jastwo słušeše k najwjetšim chłostarnjam za politiskich jatych w NDR. Mjeztym so wone­ za kubłanske poskitki a zarja­dowanja wužiwa.

Ličba wudźerjow přiběra

Błóto, błóto a hišće raz błóto: Tysacy wobdźělnikow wčera zahajeneho Heavymetal-festiwala w schleswigsko-holsteinskim Wackenje bědźa so po zliwkach z chětro njepřijomnymi wobstejnosćemi na stanowanišću a před jewišćemi. Tež dźensa wočakowachu skupiny z wjacorych krajow na cyłkownje wosom jewišćach. Na festiwalu wobdźěla so něhdźe 75 000 ludźi. Foto: dpa/Axel Heimken

Berlin (dpa/SN). Z raznej kritiku reaguja němske medije na přepytowanja zwjazkoweho statneho rěčnistwa přećiwo bloggeram internetneho žurnalistiskeho portala Netzpolitik.org krajneje přerady dla. „Stat drje ma prawo, wšelake naležnosće tajne dźeržeć. Tele přepytowanja pak wohrožeja swobodu medijow“, rjekny nawoda rešeršoweho zwjazka sćelakow NDR a WDR Georg Mascolo. Portal Netzpolitik.org bě plany wustawoškita wozjewił, čušlenje w interneće rozšěrić. „Nětko hrozy strach, zo stanu so žurnalisća zdobom skućićeljo, hdyž na přikład wo čušlenju NSA w Němskej rozpra­wjeja“, Mascolo rjekny. Přepytowanje statneho rěčnistwa ma wón za pospyt, žurnalistow a informantow zatrašić.

Wurjadny zjězd Syrizy wobzamknjeny

pjatk, 31. julija 2015 spisane wot:
Athen (dpa/SN). Grjekska knježerstwowa strona Syriza chce nutřkostronsku zwadu wo dalšim wusměrjenju na wurjadnym zjězdźe rozrisać. To je centralny komitej strony wčera wječor po wjacehodźinskej debaće wobzamknył, kaž statna telewizija ERT rozprawja. Lěwe křidło strony ministerskeho prezidenta Alexisa Tsiprasa hłosowaše minjeny čas dwójce přećiwo reformowym a lutowanskim naprawam, kotrež běchu zakład nowych jednanjow kraja z mjezynarodnymi pjenjezydawarjemi wo nowych pomocnych srědkach. Tsipras móžeše naprawy jeničce z pomocu hłosow opozicije přesadźić. Nětko hrozy pačenje Syrizy.

Za dobre styki k Ruskej

pjatk, 31. julija 2015 spisane wot:
Drježdźany (dpa/SN/K). Sakski hospodarski minister Martin Dulig (SPD) rěči za dobry poměr z Ruskej. „Pod sankcijemi napřećo Ruskej ćerpi wosebje sakski mašinotwar. Tohodla dyrbimy w kóždym padźe politiske rozmołwy z njej dale wjesć a problemy po móžnosći diplo­matisce rozrisać. Rozmołwy njesmědźa wjaznyć. Za to chcu so zasadźeć“, Dulig rjekny. K tomu wón wita, zo so sakske firmy zaso bóle w Ruskej prezentuja. „Sakska je stajnje hižo wosebje dobre styki k Ruskej wudźeržowała, a z tym chcemy pokročować. Zabyć wšak so njesmě, zo dyrbi Ruska tohorunja prawo ludow dodźeržeć.“ Sakskich eksportow do Ruskeje bě loni wo 13,4 procenty mjenje.

Cameron w nuzy

pjatk, 31. julija 2015 spisane wot:
London (dpa/SN/K). Dźiwajo na to, zo přichadźa k Ärmelowemu kanalej dale a wjace ćěkancow, schadźuje so dźensa Narodny wěstotny kabinet (Cobra), kotrehož wurjadne zeńdźenje je ministerski prezident David Cameron zwołał. Gremij ma naprawy wobzamknyć, ko­trež knježerstwu zmóžnja prekerne połoženje zmištrować. Kóždu nóc spytaja sta ćěkancow jako slepi pasažěrojo z Calaisa přez eurotunl do jendźelskeho Dovera so dóstać. We Wulkej Britaniskej nadźijeja so lěpšich šansow na azyl kaž tež přihódnišich žiwjenskich wobstejnosćow. Wčera bě premier Cameron radikalnišu zapućowansku politiku připowědźił, zo by so nawal cuzych zamjezował.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND