Drježdźany (dpa/SN). Sakska koalicija CDU, SPD a Zelenych njeje ze zestawu dwójneho etata za lěće 2021 a 2022 hišće spokojom a chce dźensa w mjeńšich skupinach dale wuradźować. Etatowu klawsuru běchu póndźelu rozkorow dla přetorhnyli. „Třo partnerojo w jednym knježerstwje trjebaja wjace chwile rozrisanje nańć“, měnješe kultusowy minister Christian Piwarz (CDU).
Mjeztym zo stej stronje Zeleni a CDU přećiwo nowym dołham za inwesticije, nochce to SPD cyle wuzamknyć. „To njeměł žadyn tabu być“, podšmórny frakciski šef SPD Dirk Panter.
„Jednanja su mjezykrok. Z našeho wida je zakładnje móžno so dojednać“, wuswětli předsydka frakcije Zelenych w Sakskim krajnym sejmje Franziska Schubert. Při wčerawšim wothłosowanju bu wona znowa w zastojnstwje wobkrućena. Parlamentariski jednaćel wostanje Valentin Lippmann, městopředsydka frakcije je dale Christin Melcher.
Dokelž njemóžeše žona swoju ruku hižo z gullyjoweho wěka w Siegburgu wućahnyć, zawołachu starosćiwi přećeljo wuchowansku słužbu. Młodej žonje bě mjenujcy kluč do gullyja padnył, a tón chcyše wona wućahnyć. Ruka pak tčacy wosta. Z pomocu wosebiteho maza su wuchowarjo žonu w běhu jenož někotrych mjeńšin wuswobodźili.
Romski kołk, debjenki ze srjedźowěka, hrajki z wiktorianskeho časa: Štóž w Londonje podłu rěki Thames za něčim pyta, móže jónkrótne kruchi nańć. Tuž přeprošuje organizacija Thames Explorer Trust na pućowanje, zo bychu za pokładami pytali. Kaž archeologowka Vanessa Bunton rozkładźe, bě rěka za čas Romjanow najwjetša deponija wotpadkow. W zwisku z přiliwom a wotliwom wody w rěce so tam tuž zas a zaso njewšědne relikty na přibrjóh dóstawaja.
Berlin (dpa/SN). Politikarka Zelenych a zamołwita za nutřkowne naležnosće Irene Mihalic so znowa za to wupraja, zo trjeba policija njewotwisnych narěčenskich partnerow za pokazki nastupajo prawicarskoekstremistiske pady. Woni měli zwonka hierarchije zakótwjeni być, rjekny Mihalic rano w telewiziji ZDF. Pozadk toho je dźensa wozjewjena rozprawa zwjazkoweho nutřkowneho ministra Horsta Seehofera (CSU) wo prawicarskoekstremistiskich padach we wěstotnych zarjadach Zwjazka a krajow.
W ÖPNV znowa stawkuja
Frankfurt nad Mohanom (dpa/SN). Tydźeń po prěnich warnowanskich stawkach zjawneho bliskowobchada (ÖPNV) njeje dźensa znowa wjele busow a tramwajkow jěło. Dźěłarnistwo ver.di bě w Hessenskej k stawkam namołwjało. We wjacorych wulkich městach, kaž Frankfurće nad Mohanom, Wiesbadenje abo Kasselu, přistajeni tuž stawkuja. W Bremenje a Delnjej Sakskej sobudźěłaćerjo akciju jutře zahaja. Ver.di zasadźa so za nowe tarifowe zrěčenje přistajenych zjawneho bliskowobchada po cyłym Zwjazku.
Daty składować zakazane
Berlin (dpa/SN). Agresiwita w nadróžnym wobchadźe je minjene lěta skerje přiběrała, město toho zo by so pomjeńšiła. To je wuslědk naprašowanja „Wobchadna klima 2020“ fachowcow za wobchadne njezboža zwjazka zawěsćowaceho hospodarstwa, kotruž su njedawno w Berlinje předstajili. Nalada je „skerje agresiwniša“, rjekny nawoda přepytowanja Siegfried Brockmann. W přepytowanju běchu so 2 000 ludźi k jich zadźerženju w nadróžnym wobchadźe prašeli. Žadyn z kriterijow njeje so polěpšił, někotre su snadnje špatniše. Tak rjekny wjace šoferow dyžli prjedy, zo za nim jěduceho z njejapkim borzdźenjom pochłostaja (42 procentow), hdyž je přeblisko přijěł. Wo něšto wjace šoferow přiznawa (45 proc.), zo hnydom reaguja, hdyž su hněwni.
Na tamnym boku čuje so wjetšina w nadróžnym wobchadźe wěsta, w koronapandemiji samo bóle hač do toho. Wjetšina woprašanych (76 proc.) je za dospołny zakaz alkohola w nadróžnym wobchadźe, prawidłowne kontrole woči žada sej 69 proc. Dale wulki problem je, zo předewšěm młodźi ludźo za wodźidłom mobilny telefon wužiwaja.
Wšo, štož so błyšći, njeje hnydom złoto. To nazhoni nětko tež paduch, po tym zo je so do filiale banki w Bad Herrenalbje zadobył. We witrinje wuhlada wón błyšćatu dulu złota. Na to rozbi masiwnu škleńcu witriny, z čimž je škodu wjacorych tysac eurow zawinił. Kaž so wukopa, pak njejednaše so wo złoto, ale bě to jenož chětro derje wuhotowana atrapa.
Ze swěrnym přećelom so rozžohnować, hač je to kóń abo dalše domjace skoćo, je nětko w Schwäbisch-Hallskim zwěrjećim krematoriju móžno. Po słowach mějićelki pochowanskeho předewzaća Sandry Lutz móža konje swojich wobsedźerjow zdźěla hač do 40 lět přewodźeć. Tak su sej dostojne rozžohnowanje zasłužili. Ludźo poskića ludźom tež wosebite popjelnicy, samo w formje sedła. Dokelž za zwěrjata winowatosć pochowanja njewobsteji, smědźa sej ludźo jich popjeł zdźeržeć abo jón na lubowanym městnje roztrusyć.
Saratow (B/SN). Clemens Pickel je wot lěta 1990 romsko-katolski měšnik w sowjetskim, dźensa ruskim Saratowje. „Moje městno je tu w Ruskej, tu mje trjebaja“, wón měni. A dźěła ma tam nadosć. Bamž Jan Pawoł II. pomjenowa jeho 1998 na biskopa, wot lěta 2002 nawjeduje wón biskopstwo swj. Clemensa w južnej Ruskej, kotrež je tak wulke kaž Portugalska, Španiska, Francoska a Němska hromadźe. Na 25 městnach bydli a skutkuje 44 duchownych, a woni staraja so wo 20 000 wěriwych. „Rozsudny je poćah ke Chrystusej“, 59lětny wuswětla, „dołhož móžu, chcu ludźi wučić so modlić, bychu-li zaso jónu bjez měšnika žiwi być dyrbjeli.“ Wot lěta 2017 je Pickel tež předsyda Ruskeje biskopskeje konferency.
Prašeja so za Bohom
Drježdźany (dpa/SN). W Drježdźanskej statnej kencliji je so knježerstwo dźensa k swojej etatowej klawsurje schadźowało. Hladajo na nowy dwójny hospodarski plan za lěće 2020/2021 su zaměry a předewzaća tež hladajo na koronapandemiju rozjimali. W minjenych tydźenjach běchu frakcije koalicije hižo prioritne lisćiny zestajeli. Na wuradźowanju kabineta w juniju so sakske knježerstwo na to dojedna, etat na dotalnym niwowje planować. Braniborska financna ministerka Katrin Lange (SPD) je dźensa za klětuši etat wjetše nowozadołženje namjetowała, a to tři město 1,9 miliardow eurow.
Von der Leyen w karantenje
Brüssel (dpa/SN). Prezidentka komisije EU Ursula von der Leyen je so do korona-karanteny podała. Zašłu wutoru měješe wona zhromadny termin z wosobu, kotraž bu wčera pozitiwnje testowana. Štwórtk drje bu von der Leyen negatiwnje testowana, nětko pak chce so znowa testować dać a so hač do jutřišeho izoluje. Minjenej štwórtk a pjatk wobdźěli so wona na wjeršku statnych a knježerstwowych šefow EU, hdźež bě tež zwjazkowa kanclerka Angela Merkel (CDU).