Berlin (dpa/SN). Zeleni su drje minjeny čas na nahladnosći mjez wolerjemi přisadźili, su pak dale ze snadnym předskokom najsylniša politiska móc w kraju. Přirunujo z minjenym tydźenjom su woni jedyn procent zhubili a přińdu po naprašowanju instituta Forsa w nadawku sćelaka RTL na 25 procentow. Unija wostawa ze 24 procentami za nimi. Jedyn procent přisadźiła je tež SPD, kotraž ma nětko 14 procentow hłosow. Hódnotu přihłosowanja polěpšić móžeše jeničce FDP, a to wo dwaj dypkaj na nětko 13 procentow. Wuslědki Lěwicy (šěsć proc.) a AfD (dźesać proc.) wostachu njezměnjene.
Bychu-li wobydlerjo Němskeje zwjazkoweho kanclera abo kanclerku sami wolić směli, by předsydka Zelenych Annalena Baerbock ze snadnymi stratami dale najlěpje wotrěznyła, najebać wjele diskutowane přepokazanki swojeje strony, kotrež bě wona zarjadnistwu zwjazkoweho sejma přepozdźe přizjewiła. Po naprašowanju by so 28 procentow ludźi za nju rozsudźiło (minus dwaj), kandidat unije Armin Laschet by 18 proc. dóstał, socialdemokrat Olaf Scholz 14 proc. Žanomu z nich njeby 40 proc. ludźi swój hłós dało.
5 000 eurow namakała a policiji přepodała je dźesaćlětna holca w Düsseldorfje. Šulerka zakładneje šule bě pjenjezy – 5 000 eurow w 50eurowskich bankowkach – mjez parkowacymi awtami wuhladała. Policija so sprawnej namakarce dźakuje. „Wutrobny dźak, Elisabeth, a wostań tajka, kaž sy!“ Nětko spytaja wobsedźerja pjenjez wuslědźić.
Šudrowanski los w hódnoće milion dolarow je žona w zwjazkowym staće USA Massachusetts mylnje we wobchodźe wostajiła, dobyće pak najebać to dóstała. Wona bě w chwatku wobjedoweje přestawki los šudrowała a njemóžeše žane dobyće spóznać. Tuž 24,50 eurow drohi los předawarce wróći, zo by jón zrumowała. Teje syn pak dny po tym zwěsći, što je prečćisnjena papjerka hódna, a dobyćerce po prěnim wahanju los wróći.
Vatikan (B/SN) Wutřěle na něhdyšeho, z Pólskeje pochadźaceho bamža 13. meje 1981 zastróžichu cyły swět. Jan Pawoł II. je tehdy ćežko zranjeny přežiwił. Za swoje wuchowanje bě wón čas swojeho žiwjenja z maćerju Božej z Fatimy, kotruž katolska cyrkej tohorunja 13. meje wopomina, w paćerju wusko zwjazany. Na róčnicu atentata su wosebje pólscy křesćenjo na Božich mšach a z modlenjom spominali. 1. meje 2011 je Jana Pawoła II. bamž Benedikt XIV. zbóžno- a 27. apryla 2014 Franciskus swjatoprajił. 2. apryla 2005 pólski bamž zemrě.
Njepłódna debata
Berlin (dpa/SN). Tino Chrupalla a Alice Weidel powjedźetaj AfD do boja k wólbam zwjazkoweho sejma w septembru. Předsyda strony a frakciska šefowka w zwjazkowym sejmje staj při internetnym woprašowanju čłonow strony 71 procentow hłosow dóstałoj, AfD dźensa zdźěli. Dalšej požadarjej, delnjosakski politikar AfD Joachim Wundrak a politikarka za digitalizowanje Joana Cotar, dóstaštaj 27 procentow hłosow. Na woprašowanju bě so 48 procentow čłonow wobdźěliło.
Palestinjan při raciji zatřěleny
Ramallah (dpa/SN). Při raciji w Kraju zapadnje Jordana su minjenu nóc młodeho Palestinjana morili. Po palestinskich informacijach bu muž wot israelskich wěstotnych mocow zatřěleny, jako bě ze swojim awtom po puću. Israelski rěčnik zdźěli, zo je specialna jednotka policije při zajeću „teroroweho aktiwista“ w měsće Ramallah jednoho z toho pomocnikow moriła. Palestinjenjo Israelej wumjetuja, zo su ćežko zranjeneho muža na puću ležo wostajili.
Wjetšina za prezencnu wučbu
Drježdźany (dpa/SN). Mnohim domjacym zwěrjatam hrozy po koronapandemiji njewěsty dóńt. Na to su zastupnicy wšitkich frakcijow Sakskeho krajneho sejma minjeny pjatk we wobłuku debaty skedźbnili. Hrozy strach, zo budu zwěrjatownje na kóncu ze žołmu wusadźenych abo wotedatych zwěrjatow přežadane, rjekny krajna předsydka sakskeje Lěwicy Susanne Schaper. Tež zapósłancy druhich stron liča z wulkim mnóstwom wotedatych zwěrjatow. Při tym su zwěrjatownje woteběracych pjenježnych darow a pobrachowacych móžnosćow dochodow na přikład z psyčimi šulemi, hižo w kritiskim połoženju, zwěsćichu zapósłancy.
Rom (dpa/SN). Bamž Franziskus je na Božej mši swjatki njedźelu wěriwych namołwjał, zo njebychu so jeničce na swoju wukonitosć koncentrowali. Jenož tón, kiž so Bohu dowěrja, namaka puć k sebi, rjekny 84lětna hłowa katolskeje cyrkwje w Pětrowej katedrali w Romje. To płaći tež za cyrkej. Poradźić pak móže so to jenož, hdyž nima čłowjek swoje projekty, struktury a reformowe plany za to najwažniše.
Franciskus swjećeše Božu mšu při hłownym wołtarju Pětroweje cyrkwje. Tohodla móžeše wjace wěriwych pódla być. Sta wěriwych sedźeše zhromadnje z kardinalemi na ławkach a stólcach wokoło wołtarja. Za čas koronapandemije běchu do toho Bože słužby w zadnim dźělu katedrale z tójšto mjenje wěriwymi swjećili. Při tradicionalnym připołdnišim modlenju před putnikami a wěriwymi modleše so bamž mjez druhim za ludźi w Kolumbiskej. Połoženje w južnoameriskim kraju, w kotrymž dochadźa hižo tydźenje dołho k protestam, jeho jara starosći. Bamž namołwješe, zahajić dialog a naprawy na dobro wobydlerjow.
Brüssel/Moskwa (dpa/SN). Jako wotmołwu na wunućene přizemjenje pasažěrskeho lětadła w Minsku je Europska unija běłoruskim lětarskim předewzaćam zakazała, europski powětrowy rum a europske lětanišća wužiwać. To je dźěl sankcijow, na kotrež je so 27 čłonskich statow EU minjenu nóc dojednało. „Wusud bě jednohłósny, bě to nadpad na demokratiju, na swobodu měnjenja a na europsku suwerenitu“, rjekny prezidentka komisije EU Ursula von der Leyen. „Tute njesłyšane zadźerženje žada sej sylnu wotmołwu z našeje strony.“
Běłoruska bě njedźelu lětadło předewzaća Ryanair po puću z Grjekskeje do Litawskeje w Minsku přizemić nuzowała, pječa hroženja z bombu dla. W mašinje bě běłoruski opozicionalny Roman Protasewič, kotrehož w Minsku zajachu. Na to smědźeše mašina dale do Vilniusa lećeć. Protasewič je mjeztym w přepytowanskej jatbje. Běłoruska jemu wumjetuje, zo je demonstracije přećiwo mócnarjej Aleksanderej Lukašenkej z wukraja sobu organizował.
Podstupim (dpa/SN). Hladajo na prěnje wotewrjenja w turistiskej branši a w gastronomiji k swjatkam žada sej Němski zwjazk dźěłarnistwow (DGB) w Berlinje a Braniborskej do přichoda sahace tarifowe zrěčenja za přistajenych tohole wobłuka. „Zawody, kotrež so ze swojimi wikowanskimi modelemi přewažnje na niske mzdy a prekerne dźěłowe wuměnjenja zepěraja, njeskića swojim přistajenym žanu spušćomnu perspektiwu do přichoda“, rjekny předsyda Berlinsko-braniborskeho wobłuka DGB Christian Hoßbach w Podstupimje.
Aktualne połoženje přistajenych w koronakrizy njesměli prosće ignorować. Pandemija je cyle jasnje pokazała, zo dyrbitej so turizm a gastronomija dale wuwić. Socialne zawěsćenje škita přistajenych před socialnym wotstupom. „To rěka: tarifowe zrěčenja, socialne zawěsćenje a sobupostajowanje město niskeje mzdy a dźěła na bazy 450 eurow“, Hoßbach podšmórny. Wotewrjenje hosćencow w Berlinje a Braniborskej dyrbjało nuznje z diskusiju wo přichodźe branše zwjazane być. K swjatkam je tójšto hosćencow zaso wotewrěć směło.