Köln (dpa/SN). Młodźinsku organizaciju AfD je zwjazkowy zarjad za škit wustawy (BfV) jako zawěsćene ekstremistiske hibanje zastopnjował. Wčera je zarjadniske sudnistwo w Kölnje tole wobkrućiło. Wobzamknjenje njeje hišće prawomócne. Strona AfD a młodźinska organiza­cija Młoda alternatiwa (JA) móžetej hišće pohóršk sewjernorynsko-westfalskemu Wyšemu zarjadniskemu sudnistwu zapodać.

JA jedna na wšitkich politiskich runinach přećiwo principam demokratije. Tež zwiski JA k organizacijam, kotrež přećiwo wustawje jednaja, za to rěča, zo ma sudnistwo Młodu alternatiwu za ekstremistisku.

Drježdźany (dpa/SN). Wjacore w sakskim sejmje zastupjene strony starosćeja so tuchwilu wo železniske projekty w swobodnym staće. „Jelizo so nětko wěste plany wutwara zadźerža, je zwjazkowe knježerstwo zaprajiło“, kritizowaše wčera politiski rěčnik za wobchad frakcije Lěwicy Marco Böhme w Drježdźanach.

Po njewobkrućenych rozprawach w medijach ma nimo dalšeho wutwara Saksko-Frankskeje magistrale tež druhi twarski schodźenk zwiska Drježdźan–Berlin na lisćinje za skrótšenje stać, kotruž je DB Infrago, infrastrukturna sparta Němskeje železnicy (DB), dohladowanskej radźe pósłała. Pozadk toho je wusud wo budgeće Zwjazkoweho wustawoweho sudnistwa.

Přeworštowanje zwjazkowych srědkow za nowo- a wutwar kolijoweje infrastruktury ma sakska frakcija Zelenych w sakskim krajnym sejmje za „jěru poražku za swobodny stat“. „Chcemy-li jako žiwjenska a hospodarska městnosć tež w přichodźe atraktiwni być, trjebamy ­dobre železniske zwiski a spušćomnu kolijowu syć“, praji wobchadopolitiski rěčnik Gerhard Liebscher.

Hdyž wo přichod serbskeho kubłanja dźe, wjerći so hladajo na šule wšo přeco wo prašenje: Što mamy sami přewzać, a kelko zamołwitosće chcemy statej přewostajić? Na wysokich šulach drje knježi wěsta awtonomija za slědźenje a wuwučowanje, najebać to ma knježerstwo politisku zamołwitosć za zakładne zaměry. Zo so na tutej wysokej powšitkownej runinje, hdźež wo cyłk wědomostneho kubłanja w Sakskej dźe, tajki „mały“ předmjet kaž sorabistika jewi, je wulki wuspěch. Społnomócnjena krajneho knježerstwa za serbske naležnosće dr. Madlena Malinkec smě so wjeselić – a wšitcy druzy zamołwići tohorunja. Z tym stat wšěm rjap skruća, kotřiž so w Lipsku, Drježdźanach, Budyšinje, Podstupimje a druhdźe za zesylnjenje profila sorabistiki angažuja. Z powšitkowneje perspektiwy je sorabistika strategisce „wulki“ předmjet: Reprezentuje najhłubše korjenje našeje domizny a zdobom najwjetšu wotewrjenosć wšěm słowjanskim ludam. Marcel Brauman

Strach před wysokosću je za tele dźěłowe městno špatna kajkosć. Tola wěda wo łódźnistwje a watowym morju stej porno tomu lěpšina. Za swoju Staru swětłownju pyta mała wuchodofriziska kupa Wangerooge noweho stražnika abo stražnicu. Požadarjo za dźěło měli po wupisanju dźěłoweho městna gmejny nimo toho ćělnje fit być. Dyrbiš znajmjeńša dwójce wob dźeń 161 schodźenkow přewinyć móc. 39 metrow wysoka čerwjeno-běło-čorna swětłownja je jedne z charakteristiskich znamjenjow znateje kupy w Sewjernym morju.

Do finala Stuttgartskeje olympiady kucharjow su wčera tak mjenowane Live-Carver swoje zamóžnosće dopokazali a z nožom wuměłske figury ze zeleniny a sada, twarožka, cokora a šokolody rězbarili. W běhu třoch hodźin dyrbjachu pjeć wšelakich twórbow pokazkow zhotowić.