Wuměłske fotografije tradicionalnych narodnych drastow a impresije z kónčin, hdźež so (hišće) w nich chodźi, tworja žro wosebiteje, takrjec dwójneje wustajeńcy, kotraž bu minjeny kónc tydźenja w Janšojcach a w Picnju wotewrjena. W fokusu su Błóta, Fläming kaž tež Bayerska.

Janšojcy/Picno (FKn/SN). Přehladka pod hesłom „Drasta a krajina“ bu minjenu sobotu w Janšojskim Serbsko-němskim domizniskim muzeju a předwčerawšim w Muzeju hětow a rybarstwa Picnjo wotewrjena. Fota su za Němski drastowy swjedźeń 2019 w Lubinje nastali, hdźež běchu w tamnišej radnicy wustajane. Cyłkownje sydom fotografkow a fotografow je so temje wěnowało a swoje wudźěłki paralelnje we wobrazowym zwjazku wozjewiło.

Jako pučowaca přehladka bě wustajeńca po tym mjez druhim w Berlinje a w Podstupimje z hosćom. Nětko su wubrane wobrazy znowa we Łužicy přistupne, a to hišće hač do kónca lěta. W Janšojcach steji „drasta“ a w Picnju „krajina“ w srjedźišću. Wobě regionalnej instituciji stej projekt koncipowałoj a zhromadnje zwoprawdźiłoj.

25. apryla 1908 narodźi so wučer a do­mi­znowědnik Maks Rječka w Radworju. Po wukubłanju na bankownika poda so na studij pedagogiki a ludowědy do Drježdźan a Wiena. Statny eksamen złoži Rječka 1933 z dźěłom wo serbskej katolskej drasće, kotrež w Časopisu Maćicy Serbskeje 1936 wozjewi. Tute wobhla­duje so jako zazběh slědźenja na tutym polu. W nim wuži tež swój wuběrny ry­sowanski talent. Pod wliwom slědźerja Adolfa Spamera wěnowaše so akribisce dalšim ludowědnym temam kaž na př. nabožnym pomnikam. Zahority Serb bě 1929 předsyda towarstwa seminaristow Włada, redaktor časopisa Serbski student, nawjedowaše 1931 Zwjazk łuži­sko-serbskeho studentstwa, bě 1932 předsyda Towarstwa Bjarnat Krawc w Drježdźanach a wot 1934 nawoda Ralbičanskeje Lilije. Po po­dušenju Sokoła w NS-času hromadźeše sportowcow w Zwjazku serbskich katolskich zwučowanskich jednotow. Wučer w Róžeńće, Chrósćicach, Konjecach a Kamjencu bu 1939 do wojakow zwołany. Żiwjenje ­nadźijepołneho slědźerja, wučerja a nana štyrjoch dźěći skónči so tragisce 1944 w Rumunskej. Andrea Pawlikowa

Aktualna wosebita wustajeńca „Jutry w Serbach“ w Budyskim Serbskim muzeju skónči so njedźelu z wosebitym wodźenjom po přehladce. Grafikar Ralf Reimann chce w 15 hodź. zajimcam mjez druhim křižowy puć, Marijanske titule kaž tež fotografije swjateho křiža předstajić a rozłožić. Foto: Monika Ošikowa

Lipsk/Choćebuz (SN/bn). Za produkciju delnjoserbskeho krótkofilma „Pytaś a namakaś“ přijimuja wotnětka přizjewjenja za casting. Kaž projekt podpěracy a poradźowacy kolektiw Lusatia Film zdźěli, pytaja „hrajerkow a hrajerjow kaž tež komparsow“. Nimo toho chcedźa „produkciske mustwo rozšěrić“. Zajimcy njech wobroća so z mailku na .

Nadrobne informacije nastupajo „wuměnjenja­ za wobsadźenje kaž tež k dispoziciji stejace róle“ podawaja pod www.lusatia-film.de.

Natočenje filma ma so lětsa w juniju wokolnje Choćebuza zahajić, premjera budźe po aktualnym stawje planowanja w nowembrje we wobłuku 33. Choćebuskeho filmoweho festiwala slědować. Režiju wukonjatej spisar scenarija Luka Golinski­ a Mira Dubian, zamołwita producentka je Sophie Riedel. Trójka zwaži so z paskom „na prěni wjetši swójski filmowy projekt“.