Žanu paniku klěšćow dla

wutora, 19. junija 2018
artikl hódnoćić
(0 )

Za Budyski wokrjes zwěsćichu eksperća zwyšeny natyknjenski strach klěšćow dla. Schorjene krejcycaki so dźeń a bóle rozmnožeja. Měrćin Weclich je so za tym w nowinarskim běrowje Budyskeho krajnoradneho zarjada prašał.

Su teritorialne rozdźěle? Jeli, kotre?

Peter Stange: Rizikowe kónčiny su pře­co na jedne lěto wupokazane. W Budyskim wokrjesu žane rozdźěle njejsu.

Měli so ludźo, młodźi kaž tež starši, klěšćow dla šćěpić dać?

Peter Stange: Haj, kóžde šćěpjenje je rozumne. A je darmotne.

Su ludźo rozdźělnje wohroženi, su mjez nimi­ rizikowe skupiny?

Peter Stange: Imunostnje słabi měli wosebje kedźbować.

Kak su ludźo na šćěpjenje přihotowani, su domjacy lěkarjo něčemu připokazani?

Peter Stange: Wšitcy domjacy lěkarjo su informowani a přihotowani, pacientam wotpowědne šćěpjenja poskićeć. Při tym je wažne rozeznawać: Přećiwo wirusowej infekciji FSME je sćěpjenski srědk, kotryž profylaktisce škita. Přećiwo bore­liozy, kotraž móže kusnjenja klěšća dla wudyrić, bohužel hišće žadyn skutkowny šćěpjenski srědk nimaja. Su-li pak na gripu podobne symptomy, měli me­dicina­rjo přepruwować, hač je kusnjenje klěšća na tym wina.

Změni-li so rizikowy teritorij, kak to wobydlerjam prajiće?

Peter Stange: Dokelž fachowcy rizikowy teritorij kompletnje na jedne cyłe lěto postajeja a definuja, so ničo njezměni.

Dyrbjeli so ludźo bojeć do přirody hić?

Peter Stange: Wězo nic, njeje žaneje přičiny, zo klěšćow dla panika wudyri. Nawopak, měli měr wobchować. Tak dyrbje­­li při wuchodźowanju w lěsu abo měšćanskim parku na so kedźbować. Wažne dźě je wědźeć, zo njetrjeba kóžde kusnje­nje klěšća hnydom inficěrować. Medicinarjo přiwšěm radźa so škitać. To mó­ža na přikład dołhe cholowy być. Připódla, klěšće tež na čłowjeka njeskoča, ale so přez trawu sobu šmórnu. Po wuchodźowanju měł kóždy swoje ćěło dokładnje pře­hladać. Klěšće lubuja wosebje mjechke dźěle ćěła kaž nutřkowny dźěl ruki, nohi abo ramjenja.

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND